Saka er sist oppdatert 15:15 fredag.
To hus var evakuert i Ringsaker fredag. Det eine fordi vatnet hadde grave ut jordmassar rundt bustaden. Det andre har vore evakuert fordi dei ikkje hadde straum i huset. Minst 66 adresser er råka av vassinntrenging.
Onsdag sende NVE ut flaumvarsel for delar av Austlandet. Auka nedbørsmengder kunne føre til lokale overfløymingar, og overvatn i tettbygde område.
Det kom mykje regn torsdag, og blant anna sette dei krisestab i Ringsaker kommune. Fredag ettermiddag melder kommunen at dei har kontroll på situasjonen.
Anders Mausethagen har jobba heile natta med å lage provisoriske demningar rundt huset i Brumunddal.
– I går rann vatnet her i full kraft, så eg fekk tatt alt eg hadde i garasjen og fekk putta det opp, med god hjelp, for å få vatnet leia vekk frå huset og nedover, seier Mausethagen.
Til slutt kom vatnet likevel inn gjennom ventilasjonsluka på det nyoppussa badet. Det er framleis mykje vatn i god straum rundt huset.
Trafikkproblem
På E6 mellom Minnesund og Hamar er farten sett ned ved Espa nordover i retning mot Hamar. Det blir arbeida med å fjerne vatn etter regnvêr. Kjem det meir regn, kan det bli vanskeleg, opplyser Statens vegvesen.
Vegtrafikksentralen Øst melder at E6 mellom Vingrom og Biri er mellombels stengt i retning Oslo grunna vedlikehaldsarbeid ved elva Vismunda.
– Det er mykje is ved brua, og det ligg også mykje is oppover i elveløpet. Me er no i gang med å grave bort isen, seier Asbjørn Stensrud, seksjonssjef for drift øst i Statens vegvesen, i ein pressemelding.
I Sel kommune er Rondanevegen ved Mysusæter stengt ein kilometer nord for avkøyring Raphamn, på grunn av snøras over vegen.
Gjøvikbanen er stengt mellom Jaren og Gjøvik grunna flaum. Bane Nor kan ikkje seie kor lang tid det vil ta, og kjem med ny vurdering klokka 02.00 natt til laurdag.
Dovrebanen har vore stengt på strekninga mellom Lillehammer og Brumunddal på grunn av jordras. Trafikken går no som normalt, melder Bane Nor på sine nettsider.
Ingen meldingar om personskade
Ordførar Ihle Steen i Ringsaker fortel at talet på meldingar gjekk ned torsdag natt.
– Når ting skjer brått og intenst slik som dette, så er dette tøft for veldig mange. Eg er glad for at, per no, har eg ikkje fått beskjed om at me har hatt noko helserelatert rundt det, seier ordførar Ihle Steen før klokka åtte fredag.
– Her er det bygningar og eigedommar som treng noko kjærleik i etterkant. Så eg håper at folk føler at dei har kontroll på situasjonen.
I kommunen held dei fram med å ha krisestab.
– Det er viktig at me som kommune jobbar det me kan, og at alle som har eigedommar tar seg ein ekstra runde og kikkar seg rundt, og ser om det er noko ein kan gjere førebyggande.
Vatn på tomter og i hus
Fleire forsikringsselskap melder om mange skademeldingar om vatn i kjellarar, og dei ventar fleire meldingar i dagane framover.
Helge Hagen fekk oppleve at vegen på tomta blei utgraven av vatn.
– Elles hadde eg ein tilhengar som var ute og bada, men eg har fått dratt den opp på trygg is, seier Hagen.
Dammen hengaren stod i var ein halvmeter djup.
– Dette skjer når det er tela i bakken og det blir bråsmelting. Det finst mykje større kriser rundt omkring, så dette skal me klare, seier Hagen.
Unni og Anders Grytting fekk vatn i kjellaren, noko dei aldri har fått før.
– Det blei rett og slett for mykje vatn. Tela har ikkje gått, og på ein eller annan måte har vatnet funne eigne vegar å gå, og det er dessverre i vår kjellar, seier Unni Grytting.
Ho oppdaga vatnet i kjellaren først fredag morgon.
I oppkøyringa til huset har dei store krater som står att etter flaumvatn.
– Det er knapt framkommeleg, seier Grytting.
Meir regn
Meteorolog Martin Granerud seier det kom over 30 millimeter nedbør stadvis i går. Lillehammer fekk mest med 34,8. Det blir vått i Innlandet fredag også.
– Det ser ikkje ut til at det blir like mykje i dag, men at ein får ein stad mellom 10 og 20 millimeter med nedbør, seier Granerud.
Meteorologen meiner det kan komme mellom 5 og 10 millimeter nedbør laurdag, før det blir gravis lettare utover sundagen.
Varselet om flaumfare frå NVE er på gult nivå. Det gjeld ut fredag.
– Det er også eit pågåande varsel om jord-, sørpe- og flaumskredfare, og med meir regn blir nok ikkje denne faren noko mindre, men per nå ligg det på eit gult nivå.
Oppmodar om å sjekke kjellarane
Brannsjef i Østre Toten, Bård Henriksen, seier fredag morgon at dei hadde mellom åtte og ni oppdrag torsdag. Desse gjaldt stort sett vatn i kjellarar.
– I dag har det roa seg litt, då det har vore kjøligare i natt. Me har fått litt mindre snøsmelting, så no er det tre oppdrag me er ute på no på morgonen, seier Henriksen.
Brannsjefen forventar det vil vere både snøsmelting og nedbør, med fare for overvatn iallfall ut laurdagen.
– Eg anbefaler folk å ta ein kikk i kjellarane viss dei har mykje verdifullt der, at dei tar det opp, så dei ikkje får skade på det, seier Henriksen.
Stengde fjellovergangar
I tillegg til mykje vatn på Austlandet, er fleire fjellovergangar stengde.
Dette i tillegg til fjellovergangane som er vinterstengde:
- Fylkesveg 27 Venabygdsfjellet er stengt.
- Fylkesveg 51 Valdresflye er stengt.
- Fylkesveg 2814 Imingfjell er stengt.
Statens vegvesen melder også om mindre hendingar på E134 Haukelifjell og fylkesveg 50 Hol-Aurland. På riksveg 52 Hemsedalsfjellet er det fare for kolonnekøyring.