Leitar fortsatt etter eldre kvinne på Dovre

DOVRE (NRK): Leiteaksjonen etter kvinna som har begynnande demens og forsvann frå hytta si tysdag ettermiddag pågår fortsatt for fullt. Låge temperaturar og tåke har gjort leitinga vanskeleg.

Leteaksjon i fjellet

TÅKE: Eit Sea King-helikopter har akkurat blitt med i leitinga. Tjukk tåke har gjort at dei ikkje har kunne vere med før.

Foto: Geir Olav Slåen / NRK

Kvinna har hatt hytte på Dovre i mange år. Ho skulle gå ein tur i nærområdet. Dei siste som såg henne såg ho gjekk frå hytta i Grimsdalen og austover.

– Vi har gjort grovsøk i natt og driv med finsøk no, seier stabssjef, Pål Erik Teigen i politiet.

Heimevernet i leteaksjon

FULL STYRKE: Røde Kors, Heimevern og redningshundar søker på bakken etter kvinna.

Foto: Geir Olav Slåen / NRK

Det er rundt sju grader og overskya i Grimsdalen. Tåka har begynt å lette.

Ber folk sjekke hyttene

Innsatsleiaren i politiet seier dei fekk melding frå familien om at kvinna var sakna rundt klokka 18 tysdag.

– Kvinna var på hytta si saman med familien sin og ho gjekk ut i totida for å gå ein tur. Ho kom ikkje tilbake, så familien begynte å leite, seier Hans Martin Aas som er innsatsleiar.

Leiteaksjon på Dovre

BAKKEMANNSKAP: Fram til tysdag formiddag har dei berre fått leita med bakkemannskap, fordi tåka har gjort at dei ikkje kan bruke helikopter.

Foto: Geir Olav Slåen / NRK

Hytta kvinna gjekk ut frå ligg i Grimsdalsvegen, ikkje langt frå bommen inn til Grimsdalen. Politiet ser på moglegheita for at ho kan ha gått inn ein plass.

– Vi ber dei som har hytter i området rundt Grimsdalsvegen om å sjekke hyttene sine, seier Teigen i politiet.

Stor aksjon

Politiet har kalla ut mange i leitinga. Blant anna er Røde Kors på plassen og frivillige frå norske redningshundar.

Eit Sea King-helikopter er på plass for å hjelpe til. Luftambulanse har også vore kalla ut, men er ferdige der no. 30 personar frå Heimevernet er også med i leitinga.

Politi i leteaksjon

POLITI: Wenche Irene Bjørnolden og Hans Martin Aas, som er innsatsleiar på jobbar med å finne den sakna.

Foto: Geir Olav Slåen / NRK

– Vi har no fem ulike søkelag i sving. Vi held på til vi finn henne, seier innsatsleiaren.

Kvinna skal vere greitt kledd for vêret og i grei fysisk form.

– Det er ikkje noko som seier at ho ikkje skal greie å gå ein tur. Vi håpar på positivt funn, seier Hans Martin Aas.

Laster Twitter-innhold

Det var full leiting gjennom heile natta og dei som var med då, vart bytta ut på morgonen.

– Det er klart dette er ressurskrevjande. Vi er veldig takksame for at dei frivillige hjelper oss, seier Pål Erik Teigen.

Heimvernet leteaksjon

HEIMEVERNET: 30 personar frå Heimevernet er kalla ut for å vere med i leitinga.

Foto: Geir Olav Slåen / NRK

Samstundes leitar mannskap også etter ein mann som er sakna på Gjøvik.

Dei låge temperaturane og tåka i fjellet har gjort leitinga utfordrande.

– Vi skulle gjerne ha brukt helikopter tidlegare, men det lar seg ikkje gjere, seier Teigen.

LEITEAKSJON: kaldt ver og tåke gjer aksjonen utfordrande for mannskapet