Leitar fortsatt etter eldre kvinne på Dovre

Kvinna har hatt hytte på Dovre i mange år. Ho skulle gå ein tur i nærområdet. Dei siste som såg henne såg ho gjekk frå hytta i Grimsdalen og austover.

– Vi har gjort grovsøk i natt og driv med finsøk no, seier stabssjef, Pål Erik Teigen i politiet.

Det er rundt sju grader og overskya i Grimsdalen. Tåka har begynt å lette.

Ber folk sjekke hyttene

Innsatsleiaren i politiet seier dei fekk melding frå familien om at kvinna var sakna rundt klokka 18 tysdag.

– Kvinna var på hytta si saman med familien sin og ho gjekk ut i totida for å gå ein tur. Ho kom ikkje tilbake, så familien begynte å leite, seier Hans Martin Aas som er innsatsleiar.

Hytta kvinna gjekk ut frå ligg i Grimsdalsvegen, ikkje langt frå bommen inn til Grimsdalen. Politiet ser på moglegheita for at ho kan ha gått inn ein plass.

– Vi ber dei som har hytter i området rundt Grimsdalsvegen om å sjekke hyttene sine, seier Teigen i politiet.

Stor aksjon

Politiet har kalla ut mange i leitinga. Blant anna er Røde Kors på plassen og frivillige frå norske redningshundar.

Eit Sea King-helikopter er på plass for å hjelpe til. Luftambulanse har også vore kalla ut, men er ferdige der no. 30 personar frå Heimevernet er også med i leitinga.

– Vi har no fem ulike søkelag i sving. Vi held på til vi finn henne, seier innsatsleiaren.

Kvinna skal vere greitt kledd for vêret og i grei fysisk form.

– Det er ikkje noko som seier at ho ikkje skal greie å gå ein tur. Vi håpar på positivt funn, seier Hans Martin Aas.

Det var full leiting gjennom heile natta og dei som var med då, vart bytta ut på morgonen.

– Det er klart dette er ressurskrevjande. Vi er veldig takksame for at dei frivillige hjelper oss, seier Pål Erik Teigen.

Samstundes leitar mannskap også etter ein mann som er sakna på Gjøvik.

Dei låge temperaturane og tåka i fjellet har gjort leitinga utfordrande.

– Vi skulle gjerne ha brukt helikopter tidlegare, men det lar seg ikkje gjere, seier Teigen.