I dag fortalte VG at den katolske kyrkja i Noreg har eit hemmeleg arkiv der overgrep gjort av kyrkjetilsette blir halde skjult.
Nå krev generalsekretær Ola Ødegaard i stiftinga Rettferd for taperne at arkivet blir utlevert.
Vil representere ofra
Ødegaard seier at hans organisasjon har lang erfaring i behandling av seksuelle overgrep og derfor kan hjelpe til i eventuelle erstatningssaker.
– Vi meiner at vi kan representere ofra i desse sakene. Vi kan ta kontakt med ofra og eventuelt hjelpe dei med søknader om erstatning. Dei kan kreve erstatning både frå staten og kyrkjeorganisasjonane.
– Ikkje overraskande
Ødegaard avviser at det er populistisk av organisasjonen å engasjere seg i denne saka.
– Vi meiner tvert imot at vi har god fagleg tyngde til å gå inn i desse sakene. Når den katolske kyrkja vil hemmeleghalde det heile og dysse det ned, så må nokon ta initiativet til å få tak i arkivet.
- Er du overraska over at det har skjedd overgrep i den katolske kyrkja?
– Nei, eg er ikkje overraska, og dette har også skjedd i den norske kyrkja og i misjonsorganisasjonar. Vi fryktar at dette kan gjelde ganske mange personar. Det går langt attende i tid og dei som har gjort dette kan stå bak ganske mange tilfelle.
