Ein person omkomen i trafikkulykke i Nord-Odal

Ein mann i 20-åra omkom etter ein frontkollisjon mellom ein personbil og ein varebil på fylkesveg 209 måndag morgon.

Ulykke Nord-Odal

Klokka 08.03 måndag morgon meldte politiet at ein person er bekrefta omkomen etter ei ulykke ved Mo i Nord-Odal i Innlandet.

Personen som omkom var ein mann i 20-åra, som var busett i Sør-Odal kommune. Han var åleine i bilen då ulykka skjedde.

Pårørande er varsla.

Får bistand

Politiet fekk circa klokka 07.15 melding om ein kollisjonen mellom to køyretøy. 10–15 minutt seinare opplyste Vegtrafikksentralen at helsepersonell var på staden.

– Det er snakk om to køyretøy som har kollidert. Det var tre personar i det eine køyretøyet og ein i køyretøy nummer to. No jobbar helse på staden, i tillegg er politiet der og jobbar med avhøyr, sa operasjonsleiar Dyre Antonsen i Innlandet politidistrikt til NRK klokka 08.20.

– Me vil få bistand av kriminalteknikarar frå politiet og ulykkesgruppa frå Statens vegvesen for å gjere kriminaltekniske undersøkingar, seier han.

Tre andre involvert

Tre andre personar skal ha vore involvert i ulykka, og er tatt hand om av ambulanse.

– Det ser ikkje ut som om dei er veldig alvorleg skadd, men det er tidleg å seie. Dei er oppegåande, seier operasjonsleiar Dyre Antonsen i Innlandet politidistrikt til VG.

Vegen forbi ulykkesstaden var lenge stengt, men var etter klokka 14.00 open igjen.