Boahtteáigge taleanttat deaivvadedje

Mii lea Kárášjoga sámi guđa taleanttas, Førde Nynorsk mediesentera viđa hárjehallis ja Oslo čieža FleRe-stipendiáhtas oktasaš?

Dan besse 18 hárjehalli guorahallat oanehis, muhto miellagiddevaš oktasaš bargovahkus Marienlystas. Golmma garra beaivvis leat FleRE-prográmma stipendiáhtat, ođđadárogiel hárjehallit ja sámi taleanttat beassan buorebut dovddiidit NRK:i organisašuvdnan, fitnat máŋgga doaimmahusas ja deaivvadan profiillaiguin, gažžan oahpu ja dieđusge maid ovttas hervvoštallan ja ovttastallan.

Viiddidit fierpmádaga ja oahppat guhtet guoimmisteaset

NRK FleRe-stipendiáhta Zahra Katrine Arnesen jáhkká dáid beivviid go leat ovttastallan, dan leat stuorra ávkin dan oahppanáigái mii sis lea dás duohko NRK:s:

– Mis lea oktasaš dat ahte leat easkaálgit dán suorggis, mas mis ii leat nu stuorra fierpmádat ja vásáhusat, ja lea somá deaivvadit earáiguin geat vásihit olu dan seamma ležžet dal Kárášjogas, Førdes dahje Oslos. Mus lea máŋggakultuvrralaš perspektiiva, muhto dát čoagganeapmi lea munnje addán viidát perspektiivva. In leat goassege oahppan nu olu sámi kultuvrra birra go dán vahku!

Ođđadárogiel hárjehalli Sander Eide Aase mielas lea ovdamunnin deaivvadit viidát geografiija dáfus.

– Hui miellagiddevaš gullat iešguđetlágan vugiid mo čoavdit dan barggu maid NRK dáfus galgat dahkat iešguđet oaidninsajis, sihke geográfalaččat, gielalaččat ja kultuvrralaččat. Mii leat lonohallan vásáhusaid ja eahpitkeahttá leat oahppan eambbo sihke dan birra, mii mis lea oktasaš ja mii earuha kultuvrralaččat. Munnje lei somá boahtit Marienlystii unna báikkážis nugo Førde lea, vázzit feaskkerráiggiid ja oaidnit man stuoris NRK duođai lea ja man olus barget dán organisašuvnnas, son lohká.

Mirja Flodin lea okta guđa sámi taleanttas dán čavčča, geassá ovdan positiiva vásáhusa ahte leat oassin stuorra NRK:s:

– Lea erenoamáš buorre beassat oaidnit mo áššit doibmet Marienlystas ja našuvnnalaš dásis. Midjiide leat NRK čeahpes mielbargit duođai addán buori fágasisdoalu. Maiddái lea leamaš hui buorre oahpásmuvvat eará taleantaprográmmaiguin ja hárjehalliiguin. Buorre beassat gullat ahte mis leat máŋga dakkár hástalusa go dain leat unnitlohkun, dat addá midjiide lassinávccaid daidda dáistalemiide main mii leat, Flodin dadjá.

Buot golmmas deattuhit ahte lea ávkkálaš beassat čielgasit dovdat ahte sis lea juogalágan doaibma deavdit NRK:s, sihke agi ja máŋggabealatgelbbolašvuođa dáfus mii sis lea.

Nanne oktasašvuođa ja ovttasbarggu NRK:s

– Dá leat 18 nuora, geain leat erenoamáš máŋggabealatvuohta, masa mis lea jáhkku ja maid dárbbašat NRK:s. Lea dehálaš ahte sii oahpásmuvvet guhtet guoibmáseaset ja ráhkadit fierpmádaga. Sin mii leat rekrutteren NRK:i min ovdánahttit ja dahkat min buorebun, seammás leat ožžon buoremusaid NRK:s oahpahit sin. Lea hirbmat dehálaš ahte taleantaprográmmaid oktavuođas besset deaivvadit. Dát gávccenuppelogis bargagohtet iešguđet guovllus riikkas ja iešguđet doaimmahusas. NRK orru leamen stuoris ja balddihahtti, muhto dán čoagganeami maŋŋá sávan ahte NRK iešalddes šaddá veahá unnibun ja oadjebasabun, dadjá Mona Solbakk, NRK Sámi taleantaprográmma fágaoahpaheaddji.

Taleantaprográmmaid golbma jođiheaddji leat oaidnán stuorra ovdamunnin čohkket čeahpes taleanttaid, fágalaš resurssaid ja čeahpes olbmuid NRK:s ovtta sadjái. Lea olu fágalaš sisdoallu maid buot golbma prográmma sáhttet ávkkástallat journalistaoahpus, dadjá NRK FleRe-prográmma jođiheaddji Iram Ansari.

– Dasa lassin leat dán golmma hárjehallijoavkkus olu mii lea oktasaš, sis lea buohkain máŋggabealatgelbbolašvuohta ja dihtet mo lea leahkit unnitlohkun servodagas. Ahte nannet dán oktasašvuođa siskkáldasat NRK:s, dat galggašii duddjot buriid kollegiála oktavuođaid ja maiddái iešluohttámuša taleantaprográmma dáfus, mii váikkuha dasa ahte NRK lihkostuvvá iežas bargguin.

Sii leat ovtta oaivilis ahte dákkár oktasaš čoagganeamit nannejit sihke ovttasbarggu ja sisdoalu olles NRK:s. Nynorsk mediesentera jođiheaddji Rune Fossum Lillesvangstu lohká alddiineaset sávaldaga ahte taleantaprográmmat ovttasbargut eanemus láhkai maiddái boahttáiggis.

– Dát golbma taleantaprográmma čájehit ahte NRK váldá iežas barggu duođas, ja dainna gal lean rámis. Lea viehka buorre ahte mii dál vuosttaš geardde sáhttit čohkket buot min golmma doaimma hárjehalliid. NRK FleRe ja NRK Nynorsk mediesenter leat dávjá deaivvadan mállásiidda oktii jagis, muhto mis ii leat goassege leamaš dákkáraš oktasaš fágalaš fálaldat. Lea áibbas čielggas ahte dát lea positiiva buohkaide midjiide. Jáhkán mii šaddat gievrrat go ovttasbargat, mii sáhttit ávkkástallat vásáhusaid ja oahppat guhtet guoimmisteamet, mis lea olu fágalaččat oktasaš. Buorre sihke hárjehalliide ja midjiide jođiheaddjiide deaivvadit ja duddjot fierpmádaga, son dadjá ja sávvá ahte dánsullasaš fálaldagat leat maiddái boahtte jagi.

Her kan du lese saken på nynorsk: NRKs tre talentprogram på felles fagsamling