Det kan bli konsekvensane om fylkesrådmann Rune Haugsdal får det som han vil. Fredag la han fram budsjettforslaget for 2016.
Blant dei som vil merka konsekvensane om budsjettforslaget går igjennom i fylkestinget er dei kollektivreisande.
Fylkesrådmannen foreslår å auka billettprisane både på enkeltreiser og periodebillettar:
Forslag til endringar:
- Enkeltbillett: Frå 35 til 37 kroner per billett.
- Enkeltbillett barn og honnør: Frå 18 til 19 kroner per billett.
- Enkeltbillett med mobilkonto: Frå 29,1 til 30,8 kroner per billett.
- Månadskort vaksen: 745 til 780 kroner per periodekort.
Fylkesrådmann Rune Haugsdal forklarar prisauken med at det år for år vert dyrare å driva kollektivtilbodet.
– Me må følgja med på utviklinga som skjer på kostnadssida. Viss ikkje får me problem, seier Haugsdal til NRK.
Takstauken er i gjennomsnitt på 4,5 %. Det skjer etter eit kraftig hopp i prisane i 2015.
Må betala på ferjene
Fram til i dag har det vore gratis å reisa med elbil på fylkesvegferjene i Hordaland. Den kraftige veksten i talet på elbilar gjer at fylkesrådmannen no meiner at ein må ta grep.
I budsjettforslaget foreslår Haugsdal at elbilistane skal betala halvparten av ein ordinær ferjebillett på dei 16 ferjesambanda i Hordaland.
– I år måtte me kompensera eit av reiarlaga fordi dei tapar pengar på at fleire køyrer elbil. Det er ikkje forsvarleg at me skal halda fram med dette i tida som kjem, seier Haugsdal.
Bokbåten kan forsvinna
Nedlegging av bokbåten Epos har vore ein gjengangar i dei fylkeskommunale budsjettrundane i vestlandsfylka. Nok ein gong foreslår fylkesrådmannen å leggja ned tilbodet. Tidlegare har fylkespolitikarane i Sogn og Fjordane lagt ned tilbodet i sitt fylke.
Om fylkesrådmannen får det som han vil, vert siste reis for det tradisjonsrike bibliotekstilbodet skje i løpet av første halvår 2016.