– Eg skulle ønska at eg kunne hatt Ulvik som base. Men Bergen er mykje meir sentralt når du skal reisa på kryss og tvers av fylket, seier Venstre-nestleiar Terje Breivik.
Stortingsmannen frå Ulvik ser på heimfylket Hordaland som ekstremt viktig i valkampen. Han peiker på at det er eit folkerikt fylke der Venstre tradisjonelt har hatt god oppslutning.
– Valresultatet i Hordaland er heilt avgjerande for kva regjering landet får, og for om me får ny statsminister eller ikkje, meiner Breivik.
- Usikker på kven du skal røysta på? Prøv NRK sin Valgomat!
Taper veljarar i Hordaland
Det ser skummelt ut for Venstre, men no gjer nestleiaren det han kan for å hindra at partiet kjem under sperregrensa i årets stortingsval.
Partiet har slite på meiningsmålingane, og på den siste frå InFact 20. juli fell Venstre ut av Stortinget i Hordaland.
Valforskar Frank Aarebrot meiner ein av årsakene til at partiet slit er konkurransen med Miljøpartiet De Grønne.
– Dei rammar i Hordaland fordi dei mobiliserer hjå dei same gruppene som Venstre; utdanna bygdeungdom og folk som bur i utdanningsområda på Vestlandet, seier Aarebrot til Nationen.
Nyleg uttalte partileiar Trine Skei Grande at Venstre må klara å gjera seg breiare, og visa fram meir enn berre miljøpolitikk.
Skal bu på hybel
Eit av tiltaka Breivik set i verk for å avgrensa tapet av veljarar, er at han flyttar frå heimstaden Ulvik, kor det bur rundt 1000 innbyggarar.
Frå 1. august og fram til valet skal han bu på hybel i Bergen, kor det bur ca. 280 gonger så mange. Målet med flyttinga er å nå fleire veljarar, og å enklare koma seg rundt i fylket.
Når han flyttar inn på tysdag, startar valkampen for fullt, og då blir oppgåva å visa kva Venstre vil gjera framover og kva dei har fått gjort dei siste fire åra.
– I politikk er det veldig greitt å leva som me lærer. At me gjennomfører den politikken som me gjekk til val på ved førre korsveg, seier Breivik.
Fattigdom og næringsliv
Nestleiaren har kampen mot fattigdom, og særleg barnefattigdom, som ein av sine sentrale saker.
– Venstre vil jobba for å betra barnevernet, og sikra trygge, gode oppvekstvilkår. Dette er heilt avgjerande for korleis resten av livet eins blir.
Elles nemner Breivik næringslivet som eit viktig satsingspunkt.
– Leverandørar og vedlikehaldsindustrien på Vestlandet og langs kysten vår har vore gjennom sitt livs verste krise. Eg ser fram til å jobba for næringspolitikk som legg grunnlaget for ny vekst.
Breivik, som straks er ferdig med to vekers ferie heime i Ulvik, meiner at det kviler ei tung bør på Hordaland Venstre og hans skuldrer.
– Valet er alltid spennande i Hordaland, men det blir ekstra spennande i år.
- Les også: