– Maskinene ubrukelege om få år

Når Commodore Pet, C64 og Nintendo møter lan-messe for tusenvis av ungdom, så er det foreldregenerasjonen som er målet.

– Det å få tilbake den kjensla du hadde på 80, 90 og 2000-talet, det er det det handlar om.

– Kulturen må ikkje gå tapt

I samband med arrangementet «Bylan» i Vestlandshallen står Bo Gøran Kvamme og Dag Erik Hagesæter bak retromessa RetroCon, ei messe for retro-spel og retro-data. Tiki 100 og den originale PlayStation-konsollen er berre nokre av dei gamle underhaldningsplattformene som får nytt liv.

– Eg synest det er viktig at denne kulturen ikkje går tapt, seier den dedikerte samlaren.

Kvamme stiller nemleg ut sine eigne samleobjekt: Nesten eitt hundre datamaskiner og spelekonsollar. Alle maskinene er operative og fungerer.

– Eg byrja i 1984. Så har det berre balla på seg. Det har nok mykje med nostalgi å gjera, men eg synest spelekvaliteten på dei gamle spela var betre, fastslår Kvamme.

Terabit og Wi-Fi

Det er ikkje tilfellet for ungdomane som sit i den andre enden av idrettsanlegget.

Bylan er eit årleg arrangement som i samband med haustferien i Bergen lokkar tusenvis av unge til tre dagar med speling i Vestlandshallen.

Med meterlange nettverkskablar, harddiskar med fleire terabit minne og automatisk lagring er kvardagen ein litt annan for dagens generasjon dataspelarar.

– Det er foreldra som køyrer borna sine til Bylan me primært siktar oss inn på. For dei handlar det om å gjenoppliva nostalgien frå då dei sat på guterommet.

Meiner unge treng sjå utviklinga

Då Commodore 64 gjorde suksess på 80-talet var det med 64 kilobit minne og kassettspelar og diskettstasjon som tilleggsutstyr.

Men det gårsdagens teknologi manglar mot dagens datagrafikk, betyr ingenting, meiner nostalgikarane.

– Det er ikkje utan grunn at Pacman, Tetris og Supe Mario framleis engasjerer. Her sitt eg 26 år seinare og har det framleis like moro, seier Tommy Sylta.

Han meiner det er viktig at dagens unge forstår kva datateknologien har vekst opp frå og kor langt utviklinga har kome.

– Eg ser at mange av dagens unge blir fascinerte. Det å oppleva ein parallell til det dei sjølv interesserer seg for, og sjå historia bak, det trur eg er viktig.

– Maskinene ubrukelege om få år

Sylta trur ikkje spelklassikarane vil døyt ut.

– Dei vil koma i andre variantar og kanskje verta relanserte til mobile operativsystem, slik mange allereie har.

Men for maskinene som står utstilt ser ikkje framtida så lys ut.

Mange har overlevd tiår med rivande digital utvikling. Sjølv om dei er hardføre, lev dei ikkje evig.

– I løpet av dei neste fem til ti åra vert truleg retromaskiner som desse ubrukelege. Dei vert øydelagde og må reparerast. Difor må dei som vil få prøva dei no.