Vann pris for å ta vare på kulturlandskap

– Å først bli nominert, og så vinne, det tar eg som ei stor ære, seier Ole Gjermund Digernes.

Kulturlandskapsprisen 2014 i Hordaland vart i år delt ut for 19. gong, og gjekk til gardsbruket Ole Gjermund Digernes har på Digernes på Stord og Otterøy i Bømlo. Garden til Digernes konkurrerte mot 11 andre gardsbruk i Hordaland.

– Det er ei stor ære, for det er jo mange fine gardsbruk i Hordaland, seier han.

– Spesielt vakker

Prisen er på 50.000 kroner, og garden er Hordaland sin kandidat til den nasjonale Kulturlandskapsprisen 2015. Temaet i år var kystgarden.

– Alle som var med frå kulturlandskapsgruppa hadde ei felles oppleving om at det var denne garden som måtte vinne i år, seier Åse Vaag som er landbruksdirektør hos Fylkesmannen i Hordaland.

– Ole Gjermund Digernes har den mest perfekte og mangfaldige kystgarden. Garden er spesielt vakker og godt varetatt, både jord og bygningar, seier ho.

Og vinnaren seier seg einig i det Vaag seier.

– Det var mykje gode ord på ein gong, men det er vel eigentleg sant, flirer han.

(Saka held fram under bilete.)

God hjelp av sauene

Digernes sin gard er delt, med garden på Digernes på Stord, og Otterøy på Bømlo eig bonden halvparten av. Der har han ein flokk med villsauer.

– Det er sauene både der ute, og her heime som gjer ein stor del ut av bevaringa av kulturlandskapet, seier Digernes.

– For meg er det viktig at det ikkje gror over med ugras, lauv og kratt. Sauene er med på å hjelpe, og så er det igjen med å produsere godt kjøt, seier han.

Han innrømmer at prisen gir inspirasjon, men på spørsmål om det blir meir arbeid framover er han litt usikker.

– Det veit eg ikkje, for eg jobbar vel eigentleg nok, seier han muntert.

SJÅ DRONEFILM FRÅ DIGERNES:

SJÅ DRONEFILM FRÅ OTTERØY: