NB! Saka er oppdatert 12. september 18.40. Venstre-nestleiar Terje Breivik fekk dei siste stemmene han trengde og blir Hordaland sin 15. representant på Stortinget Senterpartiet sin andrekandidat Nils T. Bjørke tek utjamningsmandatet.
Venstre kom over sperregrensa og gjorde dermed at nestleiar Terje Breivik kunne kjempa om utjamningsmandatet til Hordaland.
Men tysdag ettermiddag, 21 timar etter at vallokala stengde, sikra dei mange førehandsstemmene at Venstre fekk det siste direktemandatet frå Hordaland.
Det betyr at Frps Torkil Åmland mister plassen til Breivik, medan Nils T. Bjørke frå Senterpartiet tek utjamningsmandatet.
Dei nye namna
Før oppteljinga er ferdig, ligg det an til fire nye namn som blir faste representantar frå Hordaland på Stortinget: Silje Hjemdal i Framstegspartiet, Eigil Knutsen i Arbeiderpartiet, Tom-Christer Nilsen i Høgre og Nils T. Bjørke i Senterpartiet. I tillegg blir Liv Kari Eskeland i Høgre fast vararepresentant for Erna Solberg.
Tysdag ettermiddag er ikkje alle stemmene talde, men alt tilseier at dei 15 direktemandata og det eine utjamningsmandatet i Hordaland er fordelte.
Frp og V kjempa om det siste mandatet
Kampen om det siste direktemandatet i Hordaland stod lenge mellom Torkil Åmland (Frp) og Terje Breivik (V). Med den siste oppdateringa som kom klokka 07:32 hadde Åmland dette mandatet, medan Breivik hadde Hordaland sitt utjamningsmandat.
Breivik mangla tysdag ettermiddag framleis drygt 20 stemmer på å få direktemandat. Til slutt sikra han mandatet med godt over 400 og dytta Åmland ut av tinget. Samstundes opna det vegen for mjølkebonden Bjørke frå Voss.
Lenge såg det ut til at mandatfordelinga ville bli identisk med utfallet i valet i 2013, men i staden mister Høgre eitt mandat til Senterpartiet.
Det gjer at Hordalandsbenken ser slik ut.
- Høgre: 5
- Arbeidarpartiet: 4
- Framstegspartiet: 2
- Senterpartiet: 2
- Sosialistisk Venstreparti: 1
- Kristeleg Folkeparti: 1
Det gir i så fall desse 16 representantane frå Hordaland på Stortinget:
Arbeidarpartiet
- Magne Rommetveit. 61 år, 1.-kandidat.
Etter 16 år i ordførarstolen på Stord, blei Rommetveit valt inn på Stortinget i 2009. Han har sete som medlem i Transport- og kommunikasjonskomiteen i begge periodane.
- Jette Christensen. 34 år, 2.-kandidat
Valt inn som vararepresentant i 2009, men stilte som fast representant for Per Rune Henriksen sidan 2010. Har sete som medlem i Kontrollkomiteen på Stortinget i to periodar.
- Eigil Knutsen. 28 år, 3.-kandidat.
Første varakandidat frå Hordaland i perioden 2013–2017. Valt inn på Stortinget for første gong.
- Ruth Grung. 58 år, 4.-kandidat.
Valt inn på Stortinget i 2013. Medlem i Helse- og omsorgskomiteen. Tidlegare medlem i Bergen bystyre og gruppeleiar på fylkestinget.
Framstegspartiet
- Helge-Andre Njåstad. 37 år, 1.-kandidat.
Ordførar på Austevoll i ti år, frå 2003 til 2013. Leiar for Kommunal- og forvaltningskomiteen på Stortinget sidan 2013. Medlelm i Valkomiteen.
- Silje Hjemdal. 33 år, 2.-kandidat.
Medlem og gruppeleiar i Bergen bystyre sidan 2011. Valt inn på Stortinget for første gong.
Høgre
- Erna Solberg. 56 år, 1.-kandidat.
Landets statsminister sidan 2013 og partileiar for Høgre sidan 2004. Valt inn på Stortinget sidan 1987. Kommunal- og regionminister i Bondevik-regjeringa i perioden 2001–2005. Sidan Solberg blir statsminister, blir Liv Kari Eskeland (sjå under) hennar vararepresentant på Stortinget.
- Ove Trellevik. 52 år, 2.-kandidat.
Ordførar i Sund frå 2010–2013. Valt inn på Stortinget for første gong i 2013. Medlem i Næringskomiteen 2013–2017.
- Peter Christian Frølich. 29 år, 3.-kandidat.
Tidlegare medlem av Bergen bystyre. Valt inn på Stortinget for første gong i 2013. Medlem av Forsvarskomiteen.
- Torill Eidsheim. 47 år, 4.-kandidat.
Tidlegare medlem i Radøy kommunestyre og Hordaland fylkesting. Vararepresentant for Høgre i perioden 2009–2013. Valt inn for første gong i 2013. Medlem i Transport- og kommunikasjonskomiteen.
- Tom-Christer Nilsen. 48 år, 5.-kandidat.
Fylkesordførar i Hordaland i perioden 2011–2015. Statssekretær for statsminister Erna Solberg og samferdsleminister Ketil Solvik-Olsen. Valt inn som representant for første gong.
PS: Med Erna Solberg som statsminister kjem Liv Kari Eskeland (52) frå Stord inn som vara. Ho har vore ordførar på Stord frå 2007-2015.
Kristeleg Folkeparti
- Knut Arild Hareide. 44 år, 1.-kandidat.
Partileiar sidan 2011 og fast stortingsrepresentant sidan 2009. Medlem i Transport- og kommunikasjonskomiteen og Valkomiteen.
Senterpartiet
- Kjersti Toppe. 49 år, 1.-kandidat.
Valt inn på Stortinget for første gong i 2009. Tok det siste direktemandatet med knappast mogleg margin i 2013. Har sete som 1. nestleiar i Helsekomiteen på Stortinget.
- Nils T. Bjørke. 58 år, 2.-kandidat.
Bakgrunn frå kommunestyret på Voss og fylkestinget i Hordaland. Tidlegare leiar i Noregs Bondelag. Innvalt på Stortinget for første gong. Kom inn på utjamningsmandat 21 timar etter at vallokala stengde.
Sosialistisk Venstreparti
Audun Lysbakken. 39 år, 1.-kandidat.
Medlem i Kirke-, utdannings- og forskingskomiteen. Vald inn på Stortinget for første gong i 2001. Statsråd i Stoltenberg II-regjeringa. Partileiar sidan 2012.
Venstre
Terje Breivik. 52 år, 1.-kandidat.
Nestleiar i Venstre. Medlem i Finanskomiteen. Vald inn på Stortinget for første gong i 2013.
Fem går ut
Fire representantar og ein vararepresentant frå Hordaland som i dag sit på Stortinget, går ut. Representantane Sigurd Hille og Øyvind Hallerakter i Høgre, Gjermund Hagesæter i FrP og Per Rune Henriksen i Arbeiderpartiet var ikkje på val eller aktuelle kandidatar. Det var heller ikkje Erik Skutle (H), som i dag er vararepresentant for Erna Solberg.
Dersom nokon frå parti som dannar regjering blir statsråd, statssekretær eller politisk rådgjevar, vil hordalandsbenken få inn vararepresentantar. Nilsen (H) er i dag statssekretær.