Mannen (25) er sikta for å ha forsøkt å valdta ei kvinne (24) i Fosswinckels gate natt til fredag.
Han er også sikta for å ha fullbyrda ei valdtekt i Bergen nyleg, bekreftar politiadvokat Inger Lise Høyland til NRK.
– Natt til 24. juli blei ei kvinne valdteken i Bergen sentrum. Den sikta skal ha tatt kontakt med kvinna på gata om natta, og tatt ho med inn i ei leilegheit kor han truga ho til å ha seksuell omgang, seier Høyland.
Han blei i Bergen tingrett laurdag varetektsfengsla i fire veker med brev- og besøksforbod.
Sikta for episode i fjor
Siktinga omfattar også ein episode i juli i fjor, kor mannen skal kome med seksuelle tilnærmingar mot ei kvinne i Bergen sentrum. Han vart fengsla og pågrepe for dette ifjor, men det mangla bevis.
– Det kunne ikkje bevisast at det var eit valdtektsforsøk, men han er sikta for legemsfornærming, seksuell krenkande åtferd, og skremmande framferd, seier Høyland.
Høyland vil ha mannen varetektsfengsla i fire veker på bakgrunn av fare for gjentaking og fare for bevisforspeling.
– Han er ikkje tidlegare straffedømt, seier Høyland.
– Ikkje skuldig
Mannen (25) er asylsøkar, og av afrikansk opphav. Han seier seg ikkje skuldig i det han er sikta for, ifølge forsvarar Kaj Wigum.
– Min klient erkjenner ikkje straffskuld for nokon av punkta i siktinga, seier Wigum til NRK.
Politiet vil undersøka om mannen kan knytast til fleire episodar.
– Me er framleis tidleg i etterforskinga. Me vil gjera ei rekke avhøyr av vitne til hendinga, og personar i kretsen rundt den sikta. Me har ransaka bustaden hans, og gjort kriminaltekniske undersøkingar.
– Me vil naturlegvis sjå om han kan knytast opp mot andre saker, men me har ingen konkrete mistankar så langt, seier Høyland.
