Ut mot havet

– Slik er det alltid når det er sol, forklarer kaptein Eirik Åkra, før han legg til:

– Men dette er jo ingenting.

Matros Erling Herøy, oppvaksen på Fedje, seier han sjeldan vert plaga av vêret.

– Men det er jo mange passasjerar som har spydd om bord. Så det er vel mange som ser annleis på det.

Spesialbygd ferje

Det var BNR som tinga MF Fedjefjord i 2001. Den vart bygd i Bilbao i Spania med tanke på denne strekninga på den norske vestlandskysten.

– Den har til dømes stabilisatortank som gjer den særs stabil. Den er god i hardt ver. Vi må berre avbryte 4–5 timar kvart år, fortel kaptein Åkra.

Dette meiner NRK om Sævrøy-Fedje

Overfart og kaiar: 8

Innseglinga til Fedje gjennom Mulesundet er det aller flottaste stykket hordalandsk ferjefart. MF Fedjefjord tar deg inn i det trygge sundet med ferjeleiet ved kyrkja. Du segler gjennom rik kystkultur og eit levande øysamfunn. På veg til Fedje opplever du først lyngheier på Austrheim og vidt utsyn sørover mot Meland og Øygarden, og nordover i det store ukjende. Men sambandet er det mest vêrharde i fylket. Det er eit minus for mange.

Fartøy 8:

Femten år gamle MF Fedjefjord er spesiallaga for sambandet til øykommunen. Det er stabil i dårleg ver og alle bilane vert parkert trygt under dekk. Salongen er koseleg og det er god uteplass for finvêrsdagane.

Service og fasilitetar: 5

Det er kafeteria om bord, men utvalet er avgrensa. Kaffien er gjennomsnittleg for hordalandsk ferjekafe. Toalett på begge kaiane, og er du heldig er kafeen ved kaien på Fedje open.

Nostalgi og oppleving: 5

Det er livna opp med teikningar av sjøfuglar i salongen, men kanskje ein kunne ha gjort meir ut av den rike historia? Bygningane på Fedje er klart ei oppleving.

Totalt 26 (av 40)