Kystdirektoratet manglar framleis viktig kunnskap for å kunna gje ei fagleg forsvarleg tilråding om korleis faren for ureining frå vraket og lasta bør fjernast.
Det er viktig at dei får gjort desse undersøkingane til sommaren når vêret tillet det, seier fiskeri- og kystminister Helga Pedersen i ei pressemelding.
65 tonn kvikksølv
Den tyske ubåten blei senka ved Fedje på slutten av 2. verdskrigen, og hadde ei last på 65 tonn kvikksølv.
Tidlegare er det stadfesta at det fins behaldarar med kvikksølv ved og i vraket, og innbyggjarane på Fedje har lenge uroa seg for eventuelle lekkasjar frå vraket.
Undersøkjingar til sommaren
Kystdirektoratet skal til sommaren undersøkja ei rekkje tilhøve som gjeld tilstanden til kvikksølvbehaldarane og vraket for å kunna gje ei best mogleg vurdering av korleis problemet bør handterast.
Direktoratet kalkulerer kostnaden til vel 31 millionar kroner. Det står att tre millionar av løyvinga til arbeida kring vraket i fjor som blir overførte til i år.
