Tysdag vart ein turistbuss full av spanske turistar stoppa for kontroll i Åsane i Bergen. Det viste seg at den spanskregistrerte bussen vog alt for mykje.
Etter å ha køyrd bussen inn på vekta, viste det seg at den hadde 2,2 tonn overvekt.
– Bussen hadde meir last enn den er godkjent for. Dermed måtte bagasjen lastast av, før bussen kunne fortsetje turen, fortel inspektør i Statens vegvesen, Nils Rune Nævdal.
På trafikkstasjonen vart alt av bagasje sett att, før bussen køyrde vidare.
– Passasjerane opplevde det som ubehageleg å miste all bagasjen sin. No må reiseselskapet organisere vidare frakt av bagasjen, seier Nævdal.
- Les òg:
Trafikkfarleg
Bussen hadde plukka opp turistar på Flesland, og skulle på rundreise i Noreg. I første omgang var turistane på veg til Voss.
– Det vert no jobba med vidare frakt av bagasjen. Enn så lenge vert den ståande her, seier Nævdal.
– Kva konsekvensar kan det få å køyre med overvekt som dette?
– I ytste konsekvens kan bremsesystemet eller styringa svikte, og stabiliteten til bussen vert ujamn. Det kan føre til ulukker.
Får ikkje stoppa alle
Nævdal fortel at det ikkje er første gong ein overfylt turistbuss vert stoppa.
– Det varierer litt kor ofte vi stoppar slike bussar med overlast, men det er ikkje uvanleg i turistsesongen at bussane vert fylt utan at ein tenkjer på vekt. Det er ikkje den første bussen vi har stoppa i ein slik situasjon.
I fjor var om lag seks slike bussar stoppa i Åsane.
– Omfanget er nok ein del større, men det er ikkje alle vi får stoppa. Det kjem ei rekke cruiseskip til Bergen, og det kjem ofte utanlandske turistar til Flesland som reiser vidare med turistbuss. Ikkje alle vert kontrollerte.
- Les òg:
Firmaet som eig bussen har no fått eit vektgebyr. Denne bota vert høgare jo meir overlast bussen har.
– Dei fleste som vert bøtelagde for dette er utanlandske. Men vi kontrollerer også beltebruk, og i alle utanlandske turistbussar vi har kontrollert i dag har alle hatt på betalte. Der har nok fleire nordmenn noko å lære, seier Nævdal.