Den smittsame sjukdomen tuberkulose var svært vanleg i Noreg tidlegare, men det siste halve året er heile seks unge bergensarar smitta.
Smittevernlege i Bergen, Øystein Søbstad, seier at desse tala er urovekkjande.
Hoste og vekttap
Dei typiske symptoma på turkulose er mellom anna hoste, å kjenna seg slapp, trøytt og utsliten, vekttap og nattesveitte.
Berre det siste halve året er altså seks unge bergensarar smitta av tuberkulose.
Sjukdomen var vanleg i Noreg for berre nokre tiår sidan, men vaksineprogram og godt helsestell stogga utviklinga.
Smittevernlege Søbstad er uroa over at unge nordmenn blir sjuke i dag.
Smittsam sjukdom
Tuberkulose er smittsam, og omlag 300 personar blir sjuke kvart år i Noreg.
Slik det ser ut no, er det berre i Bergen at talet har auka.
Dei som er smitta i Bergen den siste tida, har truleg påført seg sjukdommen på reise i utlandet.
Og ifølgje Søbstad er vaksine ingen garanti for å hindra smitte.
- Vaksina held ikkje evig, seier han.
Kan føra til dødsfall
Brita Askeland Winje, som er rådgjevar ved Folkehelseinstituttet, seier at auken av tuberkulose blant unge i Bergen er spesiell.
- Det er som oftast eldre norskfødde pasientar og yngre utanlandsfødde pasientar som får tuberkulose, og tala i resten av landet er stabile, fortel ho.
- Dersom veldig mange blir sjuke, vil me også før eller sidan oppleva dødsfall. Folk kan også få varige skadar. No må folk vera varsame når dei er ute og reiser i område med tuberkulosesmitte, oppfordrar Søbstad.
Omlag 10% av dei som blir utsette for smitten blir sjuke.