Ei større bygning med fire bustader blei råka av brann då det tok fyr i eit naust på Søvikneset i Os.
Leilegheitsbygget låg like ved naustet, der det var kraftige flammar då brannvesenet kom fram. Det var svært mykje røyk i områda, og alle dei nærliggande leilegheitene vart fylde med røyk. .
Tre personar, ein av dei ein baby, blei tidleg evakuert frå bygget.
Dei skal ikkje vere fysisk skadde, men blei likevel tekne hand om av helsetenesta.
Kaotisk først
Brannen blei meld klokka 10.26 tysdag føremiddag. Den første timen var kaotisk for brannmannskapa.
Ein halvtime seinare var pulsen litt lågare:
– Det er trongt å kome til på staden, men vi har bra med folk på plass, sa brannsjef Hovden.
– Det er snakk om eit stort bygningskompleks med fire bustader og eit tilknytt naust. Seks personar bur her. Vi har kontroll på alle, sa brannsjef i Os Eivind Hovden klokka 11.34, ein dryg time etter at brannen blei meld.
Det var opne flammar frå naustet, men sjølve bustadane var ikkje overtente.
– Det er stor røykutvikling, fortalde brannsjefen.
Brannbåt frå Bergen
Vel ein time seinare, litt før klokka 12.30, hadde brannvesenet kontroll på brannen. Men då jobba dei framleis med å sløkke flammane i ein båt som låg inne i naustet.
– Då brannbåten kom til fekk vi først fjerna båten som låg inne i naustet. Då denne var ute vart det enklare å få kontroll på brannen i naustet, vaktoperatør Ronald Drotningsvik ved 110-sentralen
Klokka 12.55 er brannen meldt heilt sløkt.
– Det er store skadar på både naustet og båten som låg i naustet. Heldigvis har brannen ikkje spreidd seg til nokon av leilegheitene i bygget over naustet, det har stort sett berre vore kraftig røyk, seier Drotningsvik.