Alle naudetatane rykte ut då to bilar frontkolliderte nord for Tyssedal torsdag ettermiddag.
Tre personar sat i dei to bilane som frontkolliderte like sør Fresviktunnelen på riskveg 13 litt over klokka 16.
– Store materielle skader
– Dei materielle skadane er store, opplyste vaktkommandør Arne Corneliussen i 110-sentralen i Hordaland til NRK like over 16.30.
To personar blei frakta til sjukehus i ambulanse.
– Det har vore ein front mot frontkollisjon. Ein bil har kome over i motgåande køyrebane, seier politibetjent Vidar Litle-Kalsøy ved Hardanger lensmannskontor til NRK.
Oljesøl årsaka til kollisjonen
Eit stort område av vegbanen var dekt i hydraulikkolje då politiet kom fram til staden. Politiet mistenkjer at olja er den direkte årsaka til frontkollisjonen.
– Det ser ut til den direkte årsaka er at den eine bilen ikkje klarte å halda sida si ein skarp sving, og deretter kom over i motgåande køyrefelt, seier Litle-Kalsøy.
Politiet åtvarar bilistar som har køyrt riksveg 13 mellom Lofthus og Odda om at dei kan ha fått olje på dekka sine.
– Det kan gjera at dei ikkje har så godt grep på vegen.