Rolls-Royce meiner det ikkje lenger er forsvarleg å ha styremaskin-produksjon på to stader, og vil difor flytte produksjonen i Os til Haram på Sunnmøre. Dette skjer om to år.
– Stemminga er dårleg, og dei tilsette er veldig skuffa over avgjeringa til Rolls-Royce, seier klubbleiar Dag Kåre Støyva.
Han har jobba i heile 27 år for Rolls-Royce, og medan dei på Sunnmøre kunne juble for sine jobbar, så var stemningar meir trykt i Os.
- LES OGSÅ:
– Det er klart at det ikkje er nokon lett dag i dag. Me har sjølvsagt sympati for det som skjer, men det er heilt naudsynt å få endra kostnadsstrukturen på det me har, seier John Knudsen som er konserndirektør for Commercial Marine i Rolls-Royce.
Vil finne jobbar for tilsette
Valet fall på å behalde produksjonen i Haram fordi det anlegget også produserer anna utstyr enn styremaskiner. Fabrikken på Sunnmøre har nærare 500 tilsette og 26 av desse er involverte i produksjonen av styremaskinene.
I Hagavik vert det berre produsert styremaskiner og 85 av de totalt 122 tilsette på fabrikken er involvert i produksjonen. Desse 85 står no utan jobb, medan dei resterande truleg får jobb vidare hjå Rolls-Royce.
– For det første ynskjer me å halde oppe forretningsvoluma, og me vil gå inn og sjå på kva mogelegheiter det er for å få flytta folk, seier John Knudsen.
Leiinga i Rolls-Royce vil prøve å finne nye oppgåver til de tilsette i Hagavik. Nokre vil bli overført til andre stader, medan andre får tilbod om jobb ved andre anlegg i bergensområdet eller på Nordvestlandet. Det vil også bli gitt tilbod om individuell støtte til jobbsøking.
– Urettferdig
Leiinga hadde allmøte med dei tilsette tidleg torsdag, og det har også vore møte med fagforeiningar. Klubbleiar Dag Kåre Støyva seier stemninga var fatta blant dei 122 tilsette.
– Det er urettferdig fordi me har hatt veldig gode resultat i mange år, me har hatt veldig god ordreinngang, og eg synst me burde fått fortsette her sjølv om me hadde eit underskot i fjor, seier Dag Kåre Støyva.
– Eg synst det er feil å legge ned ein avdeling som går veldig bra og flytte produksjonen til ein sight som går mykje dårlegare. Me er den avdelinga i Rolls-Royce i Noreg som har gitt best resultat dei siste ti åra, seier han.
– Er det realistisk å finne arbeid til 122 personar i området?
– Ja, det trur eg faktisk. I løpet av to år, som er tida dei trur det skal gå, så eg er optimist for dei fleste, seier Støyva.