Måndag klokka 12 skal Stortinget handsame saka om akuttkirurgi ved Odda sjukehus.
– Vi er optimistar, seier leiar i LO i Indre Hardanger, Terje Kollbotn.
Han har fått med seg ein større delegasjon av lokalpolitikarar, fagleg tillitsvalde, sjukehustilsette, elevrepresentantar og andre sjukehusaktivistar til Oslo. Søndag køyrde ein full buss og fleire personbilar over fjellet for å følgje stortingsdebatten.
- Bakgrunn:
– Vi håpar på eit samrøystes Storting som konkluderer klart og tydeleg med at akuttkirurgien i Odda på døgnbasis skal bestå, og at vi saman kan vidareutvikle sjukehuset, seier Kollbotn.
90 prosent i mål
Raudt-politikaren frå Odda har vore «primus motor» for aksjonane for sjukehuset. Kampen har føregått blant befolkninga i lang tid, og kom kanskje sterkast til uttrykk då over ein tredel av befolkninga gjekk i 1. mai-tog i Odda med krav om framleis akuttkirurgi ved lokalsjukehuset.
– Før 1. mai sa eg at vi var 60 prosent i mål, kvelden 1. mai sa eg 80 prosent, og no føler eg at vi er 90 prosent i mål. Måndag er målet å ta inn dei siste 10 prosent, seier Kollbotn.
I førre veke vart det kjend at helseminister Bent Høie ombestemte seg, etter å først ha gått inn for å legge ned akuttkirurgien. Likevel har mange vore usikre på kva det er helseministeren eigentleg vil gå inn for når det gjeld sjukehuset i Odda.
- Les òg:
Kollbotn håper på tydelege svar under Stortingsdebatten måndag.
Engasjement i alle aldrar
På bussen som søndag køyrde frå Odda til Oslo var rundt ein tredjedel av passasjerane ungdommar.
– Det er eg veldig glad for. Dette er heilt spesiell samfunnskunnskap, seier Kollbotn.
Han skildrar stemninga om bord i som spent, men god.
– Mange av dei som er med på bussen har vore med i kampen for sjukehuset heile vegen, sidan før jul. Dei ønskjer å følge saka heilt i mål.
Frå klokka 10 måndag skal aksjonistane ha ei markering framfor Stortinget. Her er det planlagd appellar og ei stor mobilisering med fleire fagforeiningar.
– Vi er veldig spente og gler oss. Bodskapen vår er klar og tydeleg, og eg håpar den fell i god jord, seier Kollbotn.
Helseminister Bent Høie og stortingspresident Olemic Thommessen skal òg vere til stades på Eidsvolls plass, før debatten startar i Stortinget klokka 12.
– Eg håpar vi får ei god og tydeleg avklaring og kan gjennomføre ei forsiktig feiring etterpå, seier Kollbotn.
- Les òg: