– Det er heilt grufullt, seier Thommas Dybwad.
Han er eit av fleire vitne som onsdag forklara seg i rettssaka etter at Mona Nordaas (58) vart drepen på Evanger 16. juni i fjor.
Ein 44 år gammal mann er tiltalt for drapet. Han erkjente ikkje straffskuld då rettssaka starta onsdag.
Mannen er, ifølge advokaten hans, sjølv usikker på om han er tilrekneleg.
- Les òg:
Møtte tiltalte 17 dagar før drapet
Den tiltalte mannen kom til Evanger nokre veker før drapet fann stad. 30. mai møtte Dywad mannen for første gong.
– Eg hadde bursdag, og Mona hadde invitert til besøk. Det var som alle andre møte med nye folk. Det var ikkje noko med tiltalte som eg stussa over.
Men etter kvart gjorde tiltalte sin veremåte at Dybwad lurte på om noko var gale.
– Han kom til meg kvar dag, då han ikkje var velkomen nokon annan stad på Evanger. Folk reagerte på at han hadde mange sprø utsegn, men eg meiner at ein skal gje alle ein sjanse. I ettertid stussar eg over mykje av det han har sagt, seier Dybwad.
Natta før drapet skjedde skal tiltalte ha låst seg inn i leilegheita til Dybwad. Der fortalde han at han ønska å drepe Nordaas, og at han hadde sett klar drapsvåpenet. Men Dywad avfeia det som fyllerør.
– Eg trudde ikkje på det han sa. Dette er noko eg slit med framleis, eg kunne gjort mykje meir enn det eg gjorde.
- Les òg:
Brukte øks som drapsvåpen
Dagen etter, 16. juni, vart Dybwad letta då han såg at Mona stod i hovudvegen. Ho var akkurat komen tilbake frå ein tur til Bergen saman med ei venninne.
– Men ein time seinare såg eg tiltalte kome ut av huset hennar. Då forstod eg kva som hadde skjedd.
Inne i Nordaas sitt hus fann Dybwad 58-åringen drepen.
– Ho hadde tydelege merker frå øksa han hadde brukt.
Under ein halvtime etter at politiet kom til åstaden, vart den tiltalte mannen arrestert. På åstaden fann politiet eit fire siders brev, der tiltalte tilstod drapet.
Dybwad ber tydeleg preg av at det er vanskeleg å stå i retten og fortelje om den grufulle junidagen.
– Eg håpar sanninga kjem fram i retten, og at tiltalte ikkje skjuler seg bak andre forklaringar. Ein kan ikkje falle så lågt, og etterpå sei at ein ikkje hugsar. Det finst ikkje tilgiving for dette.