Bergen er allereie dårlegast av dei norske storbyane på sykkel. No viser ein gjennomgang NRK har gjort av dei ni målepunkta for sykkelpasseringar i byen – at det er ein nedgang på fjorten prosent samanlikna med i fjor.
- BAKGRUNN:
– Eg fekk sykkel til bursdagen so no har eg funne ut at det faktisk er raskare å sykla enn å ta kollektivtransport, seier Pål Louis Rasmussen, som har sykla langt oftare enn tidlegare det siste halvåret.
Han synest det er synd at ikkje fleire gjer det same.
– Eg er overraska over at det er færre som syklar. Sykkel er veldig i tida, og Bergen prøver å bli ein sykkelby. Men eg trur nok mykje heng saman med vêret, seier Rasmussen.
VM-byen der færre syklar
To år før Bergen skal arrangera sykkel-VM viser alle dei ni målepunkta til Statens vegvesen ein markant nedgang i talet på sykkelpasseringar.
Ved enkelte målepunkt er kvar femte syklist forsvunne.
– Det er sjølvsagt skuffande, og no må me setta inn alt på å endra den trenden. Me kan ikkje gjera noko med vêret, men me kan likevel inspirera folk til å bruka dei syklane dei har. For det ein fantastisk måte å komma seg fram på. Det er godt for både helse og miljø, seier fylkesordførar Tom-Christer Nilsen.
Saman med kommunen og staten har fylkeskommunen ansvar for å bygga ut sykkelvegar. Sjølv om fylkesordføraren legg noko av skulda på eit uvanleg vått halvår i Bergen vedgår han at politikarane må ta sin del av ansvaret.
– Vi har absolutt eit ansvar for dette. Eg syklar sjølv og ser at godt at det trengst prioriterte sykkeltrasear, seier Nilsen.
– Flaut
– Eg tenker at Bergen eigentleg bør visa seg frå ei betre side ved å bygga ut litt ekstra. Det er litt småflaut at me her i landets nest største by faktisk ligg på jumboplass, seier Jørgen Børve.
Børve og Eivind Wengaard tok treningsturen på sykkelsete i går. Dei meiner eit uvanleg bergensk bergensvêr må ta noko av skulda for at færre er ute å syklar. Men at dårlege sykkelvegar også spelar inn.
– Eg trur det har mykje å seie for at det er nedgang i syklistar. Det ligg ikkje godt nok til rette for at folk skal gidda å halda fram med å sykla, seier Wengaard.