Den fjerde utgåva av Tour des Fjords rullar inn på Bryggen i Bergen onsdag ettermiddag. Første etappe har start i Os og målgang i Bergen.
Osøyro, Søfteland, Kaland, Fanahammaren, Gullbotn, Trengereid, Arna, Salhus, Eidsvåg, Sandviken og Bergen sentrum vert påverka av rittet.
Det betyr stengde vegar og trafikkaos.
– Me er sjølv spente på korleis dette vil gå, vedgår politiførstebetjent Lars Reme ved trafikkseksjonen ved Bergen sentrum politistasjon.
VM-LØYPA: Syklistane skal etter planen sykla over Bryggen rundt 16.30. Deretter går turen gjennom deler av det som skal vere VM-løypa neste år. Deler av sentrum vil difor vera stengt og ope med ujamne mellomrom.
Foto: TOUR DES FJORDSHer blir det stengt
Slik vil sykkelrittet snu bergenstrafikken på hovudet:
- Bryggen vil vera stengt frå onsdag 31. august klokka 09 til torsdag morgon.
- Det er innført parkeringsforbod i Mindeveien, Landåssvingen og deler av Sollien heile onsdag 31. august.
- Skyss reknar med store forseinkingar i kollektivtrafikken og ber reisande rekna god tid. Les meir her.
- Politiet stenger trafikken langs traseen om lag ein halvtime før ryttarane passerer. Sjå passeringstidspunkta her. Løypekart finn du her.
- Politiet varslar store trafikale problem i Bergen sentrum. Mellom klokka 16.30 og 18 syklar ryttarane i den såkalla VM-løypa i Bergen sentrum. Sjå kart av sentrumsløypa her (arrangøren si heimeside).
- Rundkøyringa på trafikklokket på Minde er fresa ned. Syklistane skal passera gjennom rundkøyringa på si ferd frå Løborglien over Mindemyren.
- Fartsdumpane på Bryggen er skorne vekk. Natt til torsdag vert dei asfalterte på nytt.
- Sjå endringane for kollektivtrafikken i faktaboksen under
HOVUDFELTET: Dei 144 syklistane skal gjennom to fylke og 23 kommunar. Tour des Fjords vert avslutta i Stavanger sundag. Biletet er frå Tour des Fjords-rittet i Bergen i fjor.
Foto: Tale Hauso / NRKFryktar korkar i sentrum
– Spesielt trafikkavviklinga rundt Kong Oskars gate og Olav Kyrres gate kan verta problematisk, med mykje kryssande trafikk, forklarer Reme.
Politiet fryktar trafikken vil hopa seg opp i sentrum før, under og etter stenging av sentrumsgatene. I tillegg vil politiet få si fulle hyre med å halda mjuke trafikantar vekke frå vegbanen.
– Det vil verta relativt store trafikkutfordringar viss ikkje trafikantane får informasjonen med seg. Bilistar må helst unngå å køyra bil i sentrum i tidsrommet rittet går føre seg, seier Reme.
SENTRAL: Bryggen i Bergen får ei sentral rolle både under Tour des Fjords-rittet denne veka og under sykkel-VM neste år. Bryggen vil vera stengt frå onsdag morgon til torsdag morgon. Biletet er frå sykkel-NM i 2012.
Foto: Kjetil Rydland / NRKDet er litt meir enn eit år til sykkel-VM i Bergen. Difor vert årets Tour des Fjords den store generalprøven.
– Me får meir jobb no enn det blir under sykkel-VM. Då vil store deler av traseen vera avsperra. Det er den ikkje no, seier Reme.
Mest omfattande politiet har vore med på
Trafikkavviklinga i samband med sykkelrittet vert den mest omfattande bergenspolitiet har vore med på.
Politipatruljar har ansvaret for å stenga sidegater, rydda vegar og hindra møtande trafikk.
– Politiet har ikkje tidlegare gjennomført denne typen trafikkstengingar, med stengde sentrumsvegar i opp mot to timar, seier Reme.
Syklistane skal passera rundkøyringa på Fjøsangerveien ved Minde. Etter nedkøyringa gjennom Mindeveien syklar dei gjennom den nyleg asfalterte rundkøyringa.
Foto: Even Norheim Johansen / NRKVegvesenet står bak den mellombels asfalterte rundkøyringa over trafikklokket på Minde. Grunnen er at syklistane trygt skal kunna koma seg over Fjøsangerveien.
Vegvesenet oppmodar bilistar å følgja med på trafikktavler og på nettstaden til Bergen kommune og Tour des Fjords.
