Sykkeleliten kryssar fylkesgrensa når andre etappe av Pro Tour-rittet Tour des Fjords startar i Brekke og trillar i mål i Hardanger torsdag ettermiddag.
Sjølv om ryttarane ikkje er venta over fylkesgrensa før utpå ettermiddag, har trafikkutfordringane i Hordaland allereie starta.
– Folk må rekna god tid og vera budde på køar, seier trafikkoperatør Jan Marøy i Vegtrafikksentralen.
Fleire stengde vegar
Rittet går frå Brekke i Gulen vidare til Romarheim og via Modalen, Dale og Vaksdal til Trengereid. Deretter går turen gjennom Samnanger, over Kvamskogen og til Kvam. Etter å ha passert Norheimsund og Øystese syklar ryttarane til Fyksesund, før dei returnerer til målgang ved Steinsdalsfossen.
Marøy trur dei mest kritiske strekningane blir E39 mellom Brekke og Romarheim og strekninga mellom Dale og Trengereid. E39 vil vera stengd i nesten ein time midt på dagen, medan rittarrangøren åtvarar mot at E16 kan bli stengd mellom 14.30 og 16.30.
Trafikkoperatøren er likevel ikkje uroa for at trafikken på hovudinnfartsåra til Bergen vil stå i stampe.
– Me reknar ikkje med at E16 blir stengd så lenge. Distansen tek ein halvtime med bil, og dei syklar jo som «gamle-Erik» desse syklistane.
Opp mot to timar ventetid
Har du tenkt deg over fylkesveg 7 mellom Trengereid og Norheimsund, risikerer du å måtte venta lenge. Vegen kan bli stengt ved Steinsdalsfossen i periodar på opp mot to og ein halv time i tidsrommet 08 til 22. Rigigng av målområde og klargjering av løypa er årsaka.
– Me oppmodar bilistar som skal mellom Hardanger og bergensområdet om å køyra via Tysse og Mundheim. Elles håpar me folk viser omsyn og føl dei instruksane løypemannskapa gir, seier Marøy.
På fylkesveg 569 mellom Romarheim og Dale blir vegen stengd for all trafikk minst ein time før syklistane kjem. Deretter vil E16 stengast i god tid før syklistane er venta.
– Følg med på meldingar
Vegvesenet vil oppdatera sine trafikkmeldingar, medan Tour des Fjords på sine sider gir detaljkunnskap om stengetid og tid for når syklistane er venta å koma.
E39 blir stengt klokka halv eitt. Ein liten time seinare er det venta at det 120 mann store feltet rullar over fylkesgrensa og inn i Hordaland. Europavegar og fylkesvegar blir stengd i tur og orden.
Marøy ber trafikantar halda seg oppdatert på nettsider og informasjonstavler.
– Det som talar imot trafikkaos er at trafikantar får køyra kort tid etter at syklistane har passert. Det er også såpass kort stengetid på dei store hovudvegane, at me trur dette skal gå bra, seier Marøy.
– Me får enkelte telefonar frå folk som lurar på korleis dette vil gå, men me veit det sanneleg ikkje heilt sjølve.