SISTE: – Dei fleste har fått straumen attende, og circa 180 kundar er framleis straumlause, seier Jarle Hodne, kommunikasjonsrådgjevar i BKK klokka 21.30 måndag.
Kunne vare heile natta
Eit lynnedslag gjorde store delar av Sandviken straumlause, og meldinga var klokka 20.00 at skadane var verre enn venta.
– Skadane er verre enn antatt, og det har gått ut over kablar og transformatorar. Ein må rekne med at fleire i Sandviken blir utan straum heile natta, seier Tonny Nundal, kommunikasjonsdirektør i BKK.
Klokka 21.30 var feilen i Sandviken retta, men nokre var framleis utan straum.
– Sandviken sjukehus er utan straum, men me køyrer eit aggregat der, og om ein times tid har dei straumen attende der, seier Hodne.
Fløyfjellstunnelen vart også stengt i ein kort periode grunna straumbrotet i Sandviken.
Rettar kontinuerleg
BKK opplyser at opp mot 60 000 kundar i Hordaland var utan straum på det meste under ekstremværet «Nina». Med lynnedslaget i Sandviken og ekstremværet i helga, er til saman 1000 kundar framleis straumlause.
– Rundt 1000 husstandar er utan straum i fylket, så det har gått riktig veg. Fana-området er hardast ramma, seier kommunikasjonsrådgjevar i BKK Jarle Hodne, klokka 23.19.
På det meste var også 2500 kundar straumlause på Stord, melder Sunnhordland Kraftlag. 3–5 kundar har enno ikkje fått straumen attende.
NRK oppdaterer saka.