I dag kom den førebelse rapporten frå Havarikommisjonen etter den dramatiske togbrannen på Hallingskeid 16. juni.
Eit snøoverbygg tok fyr, og brannen spreidde seg til eit passasjertog på veg frå Bergen til Oslo. Heldigvis kom dei over 250 passasjerane seg uskadde ut i tide, men etter kort tid stod heile toget i full fyr. Brannen førte til svært store materielle skadar.
Rapporten som kom i dag slår fast at det mest truleg er
Vakthald i tre timar
Jernbaneverket innfører no ein ny regel som skal gjelda sveisearbeid på alle jernbanestrekningar i Noreg, som ein direkte konsekvens av rapporten.
– Vi har no bestemt oss for å innføra tre timars vakthald etter sveisearbeid. Bakgrunnen er at det ser ut som sveisearbeid var årsaka til brannen på Hallingskeid, seier fungerande direktør i Jernbaneverket Stein O. Nes til NRK.
Jernbaneverket vurderer og å laga ein eigen arbeidsinstruks for denne typen arbeid.
Kritikk mot beredskap
I tillegg til manglande rutinar ved sveising og sliping av skinner, stiller Havarikommisjonen spørsmål ved beredskapen som skulle stått klar på Voss.
Eit aggregat som skulle trekkja brannvogn og utstyr var til reparasjon, og eit reserveaggregat var ute av drift. I tillegg mangla førar som kunne kjøra utstyret, og i alt tok det nesten seks timar før ein fekk opp sløkkeutstyr.
Havarikommisjonen meiner dette vitnar om manglande beredskap frå Jernbaneverket, og at Hallingskeid-brannen er eit eksempel på dette.
– Ikkje overraska over kritikk
Jernbaneverket seier dei tar kritikken på alvor.
– Det er heilt sikkert at dette er ei alvorleg sak. Men vi kan dessverre ikkje seia at vi er veldig overraska, sidan manglar ved beredskapen og blei påpeika i ein annan rapport som kom nyleg, seier Stein O. Nes i Jernbaneverket.
Han innrømmer at Jernbaneverket ikkje er heilt der dei bør vera når det gjeld beredskap.
– Vi jobbar med å bli betre, seier Nes.