– På fem år så har det gått frå super optimisme til betydeleg nøktern stemning når det gjeld val av prosjekt, seier Bernt Grimstvedt i det lokale kraftlaget i Fusa.
Kraftlagsdirektøren er ein av mange som merkar at stemninga kring småkraftverka har snudd heilt. Økonomien har kollapsa, og årsaka er at straumprisen er venta å halde seg låg i mange år.
- SJÅ OGSÅ:
Utbyggar risikerer store tap
– Vi er usikre på korleis det blir framover, mange av dei som har bygd tidlegare slit kraftig økonomisk no, seier Rein Husebø som er sjef i Småkraft, eit selskap som driv mellom anna Tveitaskaret kraftverk i Øvre Hålandsdalen i Fusa.
Dei merkar priskollapsen, men det er verst for grunneigarar som på eiga hand har gjort store investeringar i småkraftverk.
– Det er folk som har bygd småkraftverk med 100.000 kroner i eigenkapital og 50 millionar i gjeld, og det er klart at med den gjelda så går det rett i botn, seier Husebø.
Risikerer å gå med tap
Mange som har konsesjon til å byggje kraftverk legg bort planane, og mange av dei som allereie har bygd risikerer å gå med tap. I elva Gjøno i Fusa er røyra til det nye småkraftverket nesten på plass. Her kan Grimstvedt berre håpe at dette kraftverket vert ei god investering på lang sikt.
– Styret i Fusa kraftlag avslo å delta i nye prosjekt. Lønnsemda er dårleg i alle fall på kort sikt og vi ønskjer ikkje å ta altfor stor risiko, seier Grimstvedt.
Strengare krav
NVE skal i løpet av sommaren finne ut kor mange konsesjonar som ikkje vert brukt. Det er truleg mange på grunn av lågare priser og at bankane er strengare på krava til eigenkapital.
– Om du ser på Europa så treng vi å kvitte oss med kullkraftverk og forureinande kraft. I det store perspektivet, så treng vi meir fornybar energi, seier Husebø.