Dei siste vekene har det fleire stader i Noreg vore tropenetter, og fleire vil det nok bli i tida framover.
– Minimumstemperaturen må vere over 20 grader i løpet av natta, forklarer vakthavande meteorolog ved Meteorologisk institutt, Nina Larsgård.
- SJÅ OGSÅ:
Regulere temperaturen
Når det er så varmt kan det vere vanskeleg å få sove, spesielt for barna. Søvnforskar og overlege ved Helse Bergen, Eli Sørensen, har gode tips.
– Det er viktig å prøve å regulere temperaturen i rommet. Det kan du gjere ved å ha gardiner trekt føre vinduene, slik at sola ikkje varmar opp tak, vegger og møblar. Deretter må du lufte godt før dei skal legge seg, seier Sørensen.
- SJÅ OGSÅ:
Held deg til vanar
I varmen må ein passe på at barna ikkje har for mykje over seg når dei skal sove.
– Barna treng ikkje noko anna enn ei t-skjorte og bleie om dei treng det. Å berre bruke dynetrekket i staden for heile dyna kan og vere ein god ide, seier eksperten.
– Blir det ikkje for varmt med t-skjorte?
– Nokon liker å ligge utan klede på seg, medan barn liker ofte å ha noko over seg eller på seg. Det med søvn har mykje med vanar å gjere. Er ein vane med å sove med t-skjorte eller pysjamas, så bør ein fortsetje å gjere det, foreslår Sørensen.
– Kan det hjelpe å gjere rommet ekstra mørkt?
– Ein søv best når det er passe lyst i rommet. Mange barn liker å ha nattlys, det synest eg dei kan fortsetje med, men det kan hjelpe å bruke mørke gardiner som ikkje slepper lyset inn, seier Sørensen.
Kjøl ned barna
– Dusje eller bade barnet i litt kaldare vatn før dei skal legge seg kan hjelpe. Vatn gjer kroppen kaldare, seier Sørensen.
I tillegg er det viktig at ikkje barna vert dehydrerte.
– Å drikke nok er veldig viktig. Ha drikke lett tilgjengeleg og hugs å gje barna drikke regelmessig, seier søvnforskaren.
Det er også viktig å passe på barna i sola. Om dei vert solbrente eller får for mykje sol på seg, kan det bli endå vanskelegare å sove.
– Det er veldig viktig å bruke solkrem med høg faktor og ta på lette klede på barna, seier Sørensen.
Overtrøytte ungar
– Kva skjer når ungane er overtrøytte?
– Då har ein ikkje sove godt. Om ein ligg om natta og sveittar mykje og frys, så får ein ikkje den kvaliteten på søvnen som ein treng, seier Sørensen.
– Kvifor er det vanskelegare å sovne når ein er overtrøytt?
– Det er vanskelegare å sovne fordi ein streve meir med å prøve å sove. Ofte blir barn hyperaktive når dei er overtrøytte, og då er det vanskelegare å få dei til å lande og sovne igjen, seier Sørensen.
Viktig å ta forholdsreglar
Bente Marthinsen er bestemor til to små barn og er barnepassar, ho synest det som regel har gått greitt å få barnebarna til å sove.
– Det har som regel gått greitt, men det er viktig å ta nokre forholdsreglar. Det er viktig å prøve å gje dei nok drikke og lufte godt på rommet før dei skal leggje seg. Då går det som regel greitt, seier Marthinsen.