– Tilgrising kan bli eit problem, dersom publikum skal stå i løypene i timevis med lang veg til næraste toalett, seier Andor Roald.
Han er ein av fleire som er uroa for sin eigen hage i Bergen sentrum, når sykkel-VM startar om under ei veke.
Det er venta opp mot 200.000 menneske i sentrum på ein gong under arrangementet. Roald er difor redd for at ei rekke hagar, bakgardar og kyrkjegardar kan bli naudløysinga for dei som ikkje finn toalett.
– Det vert problematisk dersom folk til dømes går på do bak gravstøtter, seier Roald.
- Les òg:
108 nye publikumstoalett
No tek Bergen kommune grep, og set opp 108 provisoriske toalett for å hindre at publikum nyttar hagar og bakgardar langs løypa for å «slå lens».
– Dette har vore eit tema i kommunen si planlegging av VM. Vi ønskjer å tilby gode løysingar og bidra til at sykkel-VM vert ei kjempeoppleving for alle. Difor vil vi ha minst mogleg tissing i hagane, seier seksjonsleiar Tord Holgernes i Bymiljøetaten.
Arbeidet med å setje ut toaletta startar i slutten av veka, og på laurdag skal dei 108 mobile toaletta vere på plass.
Toalettvognene vert fordelt på fire forskjellige stader:
- 48 toalett i Nordahl Bruns gate
- 28 toalett på Nikolaikirkealmenningen
- 16 toalett i Allehelgens gate
- 16 toalett i Nygårdsparken
– Vi håpar og trur at dette skal halde, men det blir nok vanskeleg å unngå at enkelte går på do andre stader enn på toaletta, seier Holgernes.
Kan auka kapasiteten
Totalt reknar kommunen med at idrettsfesten vil trekka ein halv million tilskodarar.
– Når desse kjem, og om alle kjem, er usikkert. Vi har forsøkt å arbeide ut gode tiltak ut frå den informasjonen vi har no, seier Holgernes.
- Les òg:
Han lovar hyppig reinhald av toaletta som vert sett ut, og seier at kapasiteten kan aukast raskt dersom det vert naudsynt.
– Vi har ein leverandør som kan stille med enkle toalettfasilitetar på kort tid. Dersom vi ser eit behov for å auge kapasiteten undervegs, set vi inn toalett der det er behov, seier Holgernes.