Men det byrja på verst moglege vis for heimelaget Sandviken. Kampuret var knapt passert sju minutt før det allereie stod 2–0 til førehandsfavorittane Arna-Bjørnar.
Kampen mot Sandviken hadde lite å seia tabellmessig for dei to laga i Toppserien i fotball, men som i alle lokaloppgjer ligg det ein del prestisje i å koma sigrande ut.
Etter berre to minutt sende Lauren Bohaboy bortelaget i føringa med eit skot i lengste hjørnet. Bohaboy kom seg fri ved høgresida av 16-meteren, forserte innover og sette venstrefoten til.
Dårleg forsvarsspel
Sandviken-keeper Ashley Thompson var borti ballen, men kan også klandra passivt forsvarsspel for at Bohaboy i det heile tatt kom til skot.
Dårleg av forsvaret var det også då Maria Brochmann auka til 2–0 etter ein corner. Umarkert fekk midtbanespelaren heade ballen i lengste hjørnet.
Sandviken slo tilbake
Men heimelaget skulle slå tilbake. Etter 32 minutt sette heimelaget i gong eit nydeleg angrep som enda med at Andrea Thun kunne sette ballen i mål på blank kasse.
Resten av kampen fortona seg som ein midtbanekrig mellom dei to bergenslaga men til slutt fekk Sandviken utteljing.
På overtid fekk kvittrøyene frispark i farleg posisjon. Dødballen gjekk rett i stolpen. På returen var kaptein Andrea Thun igjen først frampå, og heada inn utlikninga til stor jubel frå heimefansen.
Dermed enda det 2–2 i den siste kampen i årets sesong for Arna-Bjørnar og Sandviken. Arna-Bjørnar enda på sjuande plass med 26 poeng, medan Sandviken til slutt kan sei seg nøgd med ein niande plass, 21 poeng og fornya kontrakt i Toppserien.