Så langt kan du måtte køyre for å komme til tannlegen

Mange kjem til å miste tannlegen sin, dersom Hordaland fylkeskommune får gjennom sitt forslag til ny klinikkstruktur for tannhelse.

Ulvik, Masfjorden og Fedje er blant stadene der folk no risikerer å bruka fleire timar på eit tannlegebesøk. Reiserekninga må folk ta sjølve.

• Sjå det som kan bli di nye reisetid nedst i saka

I forslaget er sytten kontor nedlagde, noko Leiv Vambheim, dagleg leiar i Hardangerrådet, mislikar sterkt. Han er redd folk som for eksempel bur i Ulvik vil bruke inntil tre timar på ein tur til og frå tannlegen på Voss.

– Mange må ha følgje, og det betyr at det kan gå timar og halve dagar i reisetid. Ikkje minst betyr det at dei eldre også må byrje å reise, eventuelt med følgje og taxi. I det heile tatt, ein heilt anna kostnad.

LES OGSÅ: Ønsker søkelys på tannlegebransjen

Sterke protestar mot forslaget

Denne veka gjekk høyringsfristen ut for å meina noko om framtidas tannhelsetilbod i Hordaland: kvar og korleis tannlegekontora skal vere.

Hardangerrådet er langt frå dei einaste som har protestert. Over heile fylket har kommunestyre, bygdelag, næringsliv og talspersonar for eldre frykta lenger og kostbar reisetid.

Fylkestannlege Arne Åsan garanterer at alle innspel skal bli lytta til før politikarane til neste år vedtek den endelege planen.

– Me skal behandle innspela grundig. Dei vil bli eit grunnlag for den vidare politiske sakshandsaminga, lovar han.

Krev at tannlegane tek reisetida

Men i Hardanger er Vambheim i Hardangerrådet sitt krav til politikarane klårt: Tannlegane på regionssenter som Odda, Kvam, Voss og Knarvik heller bør reisa til småstadene for å ta seg av pasientane der dei er dersom dei små tannlegekontora skal vekk.

– Dette er ei teneste som alle innbyggjarane i landet har like stor rett på. Det betyr at dei tannlegane som jobbar på sentralklinikkane, må ha arbeidsdagar ute på bygdene, slik at det er dei som reiser og ikkje pasientane, seier Vambheim.

LES OGSÅ: Offentlige tannleger er ikke de rimeligste

Så langt må du køyre dersom forslaget frå Hordaland fylkeskommune blir vedtatt: