Hopp til innhold

Rusa båtførar låg over roret medan båten styrte mot land

Mannskap frå redningsskøyta måtte ta kontroll over plastsnekke i Hordaland.

Redningsskøyta Simrad Færder

SISTE LITEN: Redningsskøyta Simrad Færder avverja det som kunne blitt ei alvorleg ulukke til sjøs. Ein sterkt rusa båtførar var på veg mot land sundag.

Foto: Redningsselskapet

Politiet fekk sundag ettermiddag melding om ein livlaus person som låg over roret, tilsynelatande livlaus, på ei 24 fot lang plastsnekke sør for Austevoll i Hordaland.

Det var ei passerande ferje som melde frå til politiet.

Redningsskøyta Simrad Færder fekk melding frå Hovudredningssentralen og sette fart mot båten.

– Då me kom fram var båten i drift og hadde kurs rett mot land. Føraren hadde sovna og var ute av stand til å føra båten. Me prøvde å få kontakt ved hjelp av horn, men mannen var ute av stand til å oppfatta lydsignala, fortel skipper Thomas Høiseth.

Det var BA som først omtala saka.

– Kunne blitt stygt

Skipperen anslår at båten var 150 meter frå land då redningsskøyta la seg opp på sida av båten. Ein mann frå redningsskøyta tok seg over i plastsnekka og fekk stansa motoren.

– Me måtte streva for å avverja situasjonen i tide. Båten heldt 6 knop og i den farten er ikkje 150 meter så mykje, seier Høiseth.

– Det er ein del ferjetrafikk og ein del straum i området. Eg er glad for at me kom fram då me gjorde det. Det kunne sett ordentleg stygt ut viss båten hadde treft land.

Redningsmannskapet prøvde i lang tid å få kontakt med føraren, før dei kontakta ambulansebåt for å sjå bort frå at episoden var relatert til mannen sin helsetilstand.

– Nesten livlaus

Skipperen og mannskapet slepte den eldre båten klar av land og fekk fortøydd han ved næraste kai. Mannen blei overlevert politiet.

– Han var sterkt rusa, nesten livlaus. Han var ikkje i stand til å føra båten, seier operasjonsleiar i Vest politidistrikt, Morten Kronen.

Den rusa havaristen blir teken med til legevakt for avlegging av blodprøve før han blir overlevert lensmannen på Austevoll. Mannen blir meldt for promillekøyringa

– Det er godt det er rolege vêrtilhøve. Viss ikkje kunne dett gått verkeleg ille, seier Kronen.