Robin Dale Oen blei vekt midt på natta: – Pappa seier at Alexander har svima av i dusjen

I Flagstaff i Arizona er dei beste norske symjarane på treningsleir. Det er 30. april 2012. Alexander Dale Oen (26) er fersk verdsmeister, og favoritt til OL i London neste år.

Men han har ikkje følt seg heilt i form den siste tida. Legene trur han har trent for hardt. Dei finn aldri ut at problemet ligg i genane til Alexander.

Han er i dusjen då hjartet slår for siste gong.

Heime i Øygarden er det natt. Robin Dale Oen søv ved sidan av kona Vibeke, som er høggravid. Han vert vekt av at telefonen ringer.

– Det er pappa. Han seier at Alexander har svima av i dusjen.

Robin kastar på seg kleda og spring opp til foreldra, som bur like ved. Nokre minutt seinare får han beskjeden om at veslebroren har gått vekk.

Fortel for første gong

Robin og Alexander gjorde det meste saman. Dei trente mot verdstoppen i symjing, reiste rundt som idrettsmenn. Dei budde saman mesteparten av livet.

Robin si kone, Vibeke, seier dei to brørne var tettare enn tvillingar.

– At Alexander døydde, var som å miste ein kroppsdel for Robin.

Robin Dale Oen seier han ikkje har orka å snakke med nokon om korleis han opplevde at veslebroren gjekk vekk.

– Det er ei oppleving som er grufull. Ei kjensle av at dette skal ikkje skje. At det ikkje kan skje. Det var heilt forferdeleg.

– Og det er det framleis. Men ein har berre to val: å stoppe opp eller å halde fram.

• Sjå den nye NRK-dokumentaren «Arven etter Alexander»:

Satsa alt

Robin vel å halde fram. På tallause turar og treningssamlingar har dei to brørne planlagt og snakka om kva dei skal få til etter symjekarrieren

– Eg hugsar vi gjekk opp mot foreldra deira sitt hus. Då seier eg til Robin: «Dei planane du og Alexander hadde ... Kanskje dette er tida for å sette dei ut i livet?», fortel Vibeke.

– Hadde ho ikkje sagt det då, hadde det aldri blitt noko av, seier Robin.

To dagar etter dødsfallet, får dei sonen Trygg Alexander. No er både han og deira felles prosjekt «The Dale Oen Experience» nesten sju år gamle.

• For Robin satsa hus og heim for å oppfylle løftet til broren.

– Handterer sorga

Visjonen til dei to brørne var å ta med barn og ungdom ut i naturen.

Robin og Vibeke Dale Oen meiner dei gjorde dei beste dei kunne ut av ein forferdeleg situasjon. Robin seier han framleis har veslebroren med i prosjektet kvar dag.

– Dette prosjektet vart min måte å handtere sorga på. Det er det framleis.