Bringebærprodusent, Arne Unneland er overraska over kor tidleg bringebærsesongen starta i år.
– I år plukka vi dei fyrste korgene den 7. juli og i fjor så var dei første røde bæra ikkje før den 27. juli, seier Unneland.
Dette er ei skilnad på rundt tre veker. I fylgje Unneland brukar fleire å kjøpe bringebær etter fellesferien, men i år kan det vera for seint.
– Det kan hende at folk får ei overrasking når dei ser at bringebæra er så tidlege som dei er i år, seier Unneland.
- SJÅ OGSÅ:
Fin vår og varm juli
BRINGEBÆR: bringebærsesongen kan vera ferdig allereie om 2–3 veker.
Foto: Marita Skeie / NRK– Det har vore ein så fin vår og varm juli, at dei fleste bærtypane kjem 2 til 3 veker før eit normalt år, seier Anita Sønsteby, forskar i Bioforsk.
Ho fortel at jordbærsesongen snart er over og at bringebærsesongen kan vera ferdig allereie om 2–3 veker. Om ein skal plukka blåbær og molter, kan det gjerast allereie no.
– Det er nok eit rekordår vi ser no. Overalt i landet er bærmodninga 10–20 dagar tidlegare enn vanleg, seier Sønsteby.
Bæra vert moden raskare
Den tidlege modninga kan få store konsekvensar for bærprodusentane.
– Dei som er avhengig av plukkehjelp og som ikkje har fått føresett at dei trengde plukkehjelpa så tidleg, kan få eit problem sidan bæra vert moden så raskt, seier forskaren.
– Det er varmen i juli som har gjort at bæra vert moden raskare. Då får ein meir bær i marknaden samtidig, sånn at prisane og kan bli påverka, seier Sønsteby.
Unneland er klar på kva han synest om den tidlege modninga.
– For min del kunne den ha kome noko seinare, for no vert det veldig hektisk, seier Unneland.
