Regjeringa vil opne for bygging av kraftverk i flaumelva

– Dette er eit kinderegg. Vinn-vinn-vinn for flaumsikring, kraft og kommune, seier stortingsrepresentant Øyvind Halleraker (H).

Regjeringa la i dag fram eit forslag for Stortinget om å opne for konsesjonsbehandling av kraftproduksjon i nedre del av det verna Opovassdraget i Odda.

– Dette har vi jobba lenge med og eg er glad regjeringa kjem til Stortinget med ei sak, seier Helge Andre Njåstad, stortingsrepresentant for Hordaland Frp.

• Bakgrunn: Vil bygge flomtunnel og kraftverk i Odda

Sikre mot flaum

Fem hus, ein buss og ein garasje vart feia vekk då Opo-elva skar seg gjennom Odda sentrum natt til 29. oktober i 2014. Etter storflaumen har Noregs vassdrags- og energidirektorat (NVE) starta eit omfattande arbeid i sjølve elvelaupet, for å sikra at elva skal kunna tole minst 200-årsflaumar.

NVE sitt arbeid er langt frå ferdig, men parallelt med dette har Odda kommune sett på moglegheita med Sunnhordland Kraftlag AS (SKL) om å oppretta ein flaumtunnel kombinert med kraftverk.

– Dette er eit spennande prosjekt som både kan bidra til å sikre Odda mot flaum, og gje betydeleg ny fornybar kraftproduksjon og skape arbeidsplassar, seier Njåstad.

• Alt om: Oktoberflaumen 2014 på Vestlandet

Må ha samtykke

Opovassdraget er verna mot kraftutbygging, og det kan ikkje opnast for konsesjonsbehandling utan Stortinget si samtykke.

– Eg har stor tru på at vi har mange parti med oss på at dette er fornuftig. Men no ligg ballen hos SKL for å løfte fram prosjektet, seier Njåstad.

– Kva er det som gjer at regjeringa kan sjå vekk ifrå at dette vassdraget er verna?

– Flaumen i 2014 viste oss at her må vi gjere noko. Det er store investeringar som trengst for å sikre mot nye flaumar, og her kan vi gjere det på ein måte som det også er økonomi i, seier Njåstad.

• Utfordringane står i kø - eitt år etter flaumen

Ta vare på verdiane

Han legg til at dette er ei enkeltsak som har fått spesialbehandling.

– No må vi finne ein fornuftig balanse mellom det å sikre lønnsemd for utbyggaren, samtidig som ein tar vare på verdiane i vassdraget gjennom til dømes å ha ei minstevassføring, seier stortingsrepresentanten.

Dette er tema som vil bli arbeida med i den ordinære konsesjonsbehandlinga som dei no set i gong med basert på dagens sak til Stortinget.