Gasslekkasjen og evakueringa på Mongstad utanfor Bergen er den sjette hendinga på Statoil sine anlegg dei siste to vekene.
600 personar vart evakuert då det oppstod ein hydrogenlekkasje ved bensinanlegget på oljeraffineriet.
– Alle slike alarmar tek vi veldig alvorleg, og vi handlar etter det. Hydrogen utgjer ein eksplosjonsfare, seier pressekontakt Elin Isaksen i Statoil til NRK.
Fleire alvorlege hendingar
Statoil jobbar no med å få finne ut kva som er årsaka til dagens lekkasje.
Men problema har stått i kø for selskapet dei siste to vekene.
- 12. oktober: Ein gasslekkasje på Stureterminalen i Øygarden i Hordaland sender seks personar på sjukehus. Av dei ein 17 år gamal gut med kritiske skader. Alle pusta inn den giftige gassen hydrogensulfid.
- 15. oktober: 20 tilsette på boreriggen Songa Endurance blir evakuert frå plattforma som opererer på Troll-feltet. Årsaka er ein gasslekkasje i ein brønn.
- 16. oktober: Det oppstår ein brann i ei lastepumpe i utstyrsskaftet på Statfjord A-plattforma. Delar av mannskapet blir evakuert med helikopter. Det tek ei veke før plattforma er tilbake i normal drift.
- 16. oktober: Ein gasslekkasje på Gullfaks A-plattforma sender fleire av dei 210 tilsette i livbåtane.
- 23. oktober: Mannskap på Snorre A-plattforma må mønstre i livbåtane, etter at gassalarmen gjekk, skriv Aftenbladet.
Kallar Statoil inn på teppet
Om dei tre hendingane 15. og 16. oktober seier Petroleumstilsynet (Ptil) at menneskeliv kunne gått tapt.
Dei har bestemt seg for å granska tre av hendingane; lekkasjen på Stureterminalen, brannen på Statfjord A og brønnproblema på Songa Endurance på Troll-feltet.
I tillegg er toppleiinga i Statoil kalla inn til møte med Petroleumstilsynet tysdag.
– Det har vore mykje Statoil den siste tida, med fleire svært alvorlege hendingar. På møtet må Statoil forklare korleis dei opplever hendingane og kva som er bakanforliggande årsaker, seier pressekontakt Eileen Brundtland i Ptil.
Sjokkert
HMS-ansvarleg og 2. nestleiar i Safe, Roy Erling Furre, seier han er sjokkert over det som har skjedd dei siste to vekene.
– Eg aldri opplevd makan. Det er heilt unikt og heilt ekstremt, seier Furre til NRK. Han har jobba i bransjen sidan 1979.
Han presiserer at ein ikkje kjenner årsaka til hendingane enno, og at nokre av dei er under gransking.
– Men talet på hendingar og omfanget gir meg ei svært dårleg magekjensle.
– Vi står oppe i ei heseblesande tid med omstillingar og kostnadsfokus. Eg gjer meg nokre tankar om at tilsette som normalt jobbar med helse, miljø og tryggleik, no må nytte ressursane sine på prosessane med nedbemanningar og kostnadskutt, kommenterer Furre.
Ser alvorleg på hendingane
Mediekontakt Morten Eek i Statoil seier granskingar og selskapet eigne undersøkingar av hendingane, må gi svara på kva som har skjedd.
– Me ser alvorleg på hendingane og må finna ut kva som ligg bak. Det er ulike hendingar og me vil sjå på dei kvar for seg. Deretter må vi læra av det, slik at vi kan forbetre oss.
Han presiserer at omstillingar og kostnadskutt ikkje skal gå på bekostning av tryggleiken, slik Furre i Safe fryktar.
– Me, som resten av bransjen, gjer naudsynte omstillingar for å driva meir effektivt. Men forbetringane skal ikkje gå på bekostning av tryggleiken så me må gå gjennom hendingane for å finna ut kva som har skjedd, avsluttar Eek.