Politiet med to nye krimsaker - vurderer å be Kripos om hjelp

Ein 50 år gamal dansk statsborgar er sikta for forsettleg drap på ei 35 år gamal kvinne frå Etiopia. Samstundes jobbar politiet for fullt i saka der ein 62 åring vart funne død i Loddefjord fredag. Stesonen er arrestert og sikta for lekamsskading med døden til følgje.

Dette er krevjande for bergenspolitiet, som alt har mykje arbeid med fleire saker som har blitt gjenopna denne hausten, seier politiadvokat Trond Eide.

– Ressursbruken er særdeles krevjande. I begge sakene har me tidleg har ein gjerningsmann. Det gjer det litt lettare å handtere, men det er krevjande for heile Hordaland politidistrikt. Me har også mange andre store saker som er under etterforsking hos oss.

LES OGSÅ: Erkjenner ikkje straffskuld etter dødsvald

Har gjenopna fleire saker

I haust har politiet gjenopna fleire saker, mellom dei den mykje omtala Monika-saka. Politiet har også sett i gang igjen etterforskinga av saka til kvinneaktivisten Shilan Shorsh, som døde i ein brann i Fyllingsdalen i 2013.

I ettertid har bergenspolitiet måtta tola mykje kritikk for å ikkje sette inn nok ressursar.

– Hordaland politidistrikt har ikkje for vane å la vere å be om bistand, seier politimeister i Hordaland politidistrikt Geir Gudmundsen.

Vurderer å be Kripos om hjelp

Denne helga har politimeisteren fått to ny alvorlege saker på bordet. I dag blir det vurdert om bergenspolitiet treng hjelp til å etterforske dødsvalden i Loddefjord og drapet i Fyllingsdalen.

– No vil me bruke dei fyrste timane til å sjå korleis ressursbehovet er framover: Om det er slik at me kan klare det ved hjelp av bistand frå andre lensmannskontor eller stasjonar i eige distrikt, eller om me eventuelt må me be Kripos om hjelp, seier Gudmundsen.

– Det at me har to personar som er sikta i desse to alvorlege sakene gjer det litt lettare for oss, men samtidig krev så alvorlege saker ei brei etterforsking som vil vere ressurskrevjande.

LES OGSÅ: Politiets Fellesforbund om Monika-saken: Hver stein må snus