Politiet i Hordaland presenterte tysdag resultata for 2015 på ein pressekonferanse på politihuset. Resultata gjeld for tidlegare Hordaland politidistrikt, som no er slått saman med Sogn og Fjordane i nye Vest politidistrikt.
Ein av statistikkane som uroar politileiinga i distriktet er det høge talet på saker som ikkje er påtaleavgjort, såkalla restansesaker. Ved utgangen av 2015 hadde Hordaland politidistrikt over 4700 slike saker som har lagt for lenge.
– Det er for høgt. Dette er saker som har lagt i fleire månadar, og vi har eit bevisst fokus for 2016 å få ned dette talet, seier visepolitimeiser John Reidar Nilsen til NRK.
MANGE SAKER PÅ VENT: Talet på saker som ligg for lenge har gått opp igjen i Hordaland. Politidistriktet
Foto: Hommedal, Marit / NTB scanpixMonika-saka tok ressursar
Utviklinga er negativ i forhold til 2014. Då klarte politiet å gjera eit kraftig innhogg i dei sakene som hadde lagt for lenge frå 2013, og fekk avgjort fleire gamle saker.
No har altså talet på liggande saker gått opp igjen. Totalt er det 4779 saker som ikkje er påtaleavgjort.
Ein av forklaringane til Nilsen er den kjende Monika-saka, som skaka politiet i 2014 og 2015. Saka er no sendt til påtaleavgjerd hjå statsadvokaten, men Nilsen seier det er ei sak som har tatt store ressursar.
– Det er mange som har vore involvert i denne etterforskinga. Den har tatt mykje merksemd, som igjen har svekka kapasiteten.
12 påtalejuristar forsvann
Målet for 2016 er altså å få ned talet på restansesaker, men visepolitimeisteren vil ikkje opplysa om kor dei bør ligga.
– Vi må komme ned på eit tal som gjer at vi har balanse mellom saker som vert sluttført, og dei sakene som ligg i porteføljen vår. Vi må betydeleg ned.
Nilsen peikar også på at politidistriktet i 2015 opplevde eit mannefall i talet på påtalejuristar. I alt har 12 juristar anten slutta eller tatt permisjon det siste året.
– Vi har vore nøydd til å erstatta dei. Det har gått merkbart utover kapasiteten at vi har hatt ei så stor utskifting av påtalejuristar.
