Plutseleg dukka varaordføraren opp som både død, «drama queen» og promillekøyrar

Dei siste vekene har eit bilete av nyvald varaordførar Kenneth Lyng Karlsen (Frp) i Etne dukka opp på ei rekkje nyheitstitlar frå lokalavisa Grannar på Google sitt nyheitssøk.

Saker med titlar som «varmgang i pumpa», «mistanke om promille» og «mann omkom» har alle dukka opp med eit bilete av Karlsen.

– Noko av det er jo morosamt, men i dag er det mange som berre les overskrifta snarare enn saka. Bilete av meg under «mann omkom» er jo ganske uheldig, og kan fort spreie seg, seier Karlsen.

Blei kalla «drama-queen»

Det var vener av den ferske varaordføraren som gjorde han merksam på at hans bilete var feilaktig kopla til artiklane. Plutseleg byrja det å renne inn med skjermdumpar på Snapchat og Messenger, med stadig meir lattermilde kommentarar.

Det toppa seg då biletet av varaordføraren også dukka opp under saka «drama-queen svindla butikk».

– Eg har blitt kalla mykje rart, men den var ny, seier Karlsen.

Etter å ha gjort nokre undersøkingar, fann Karlsen ut at feilen oppstår når avisa publiserer saker utan bilete. Google hentar då automatisk eit tilfeldig bilete frå nettstaden, som vil dukke opp på alle saker som manglar eit hovudbilete.

Har kontakta Google

Dagleg leiar i Grannar, Arve Skogen, fortel at avisa no har teke kontakt med Google og bedt dei endre eller fjerne sakene som ligg ute med feilkoplinga.

Avisa har òg opplevd eit liknande tilfelle for ei stund tilbake.

– Det er typisk på notisar og hendingar at dette har skjedd. No har vi lagt inn eit logobilete for å unngå at dette skal skje igjen, seier Skogen.

Avisa veit ikkje kor lang tid det vil gå før artiklane som alt ligg ute vil bli endra av Google, men håpar på rask respons.

Sjølv tek varaordføraren det heile med godt humør.

– Men no tenkjer eg at Grannar får ordne opp, seier Karlsen.