– Her ser du smitta pærebrann. Me har funne angrep over heile Lindås. Ifrå Lygra i vest, i Kolsås og her i Knarvik er det no angrep, seier seniorrådgjevar i Mattilsynet, Brita Toppe, medan ho peikar på ein plante infisert av den frykta pærebrannen.
Plantesjukdommen spreier seg med stor fart i Nordhordland. Pærebrann som kan føre til stor skade på eple- og pæretre, er i år for første gong påvist i Lindås. Det uroar fruktbøndene.
– Det er veldig trist. Det er mykje arbeid å ta det vekk, seier Jorunn Ekerheim frå Knarvik.
LES OGSÅ:
– Mattilsynet er for defensive
Pærebrann er på verdsbasis den sjukdommen som gjer størst skade på eple- og pæretre.
Atle Bondevik og broren Odd har på oppdrag for Mattilsynet i mange år kjempa ein aktiv kamp mot den lumske plantesjukdommen.
– Me fjernar buskene, og ved større mengder går me inn med motorsag og fliskuttar og får det vekk.
LES OGSÅ:
Epledyrkar Odd Molvik, 3 mil lenger innover i Lindås er no uroa. Han er redd vidare spreiing av fruktdyrkarane sin store skrekk.
– Eg tykkjer Mattilsynet er for defensive. At dei ikkje har midlar til å setje inn nødvendige tiltak er for svakt.
Plantesjukdommen betyr ein stor kostnad både i parkar og private hagar, der den blant anna går til angrep på 12- 14 ulike mispelartar.
Mattilsynet: – Me klarar ikkje stoppe dette åleine
Mattilsynet tek kritikken til Målvik på alvor, men seier dei ikkje har pengar til å fjerne pærebrann heilt.
– Eg er glad for at han seier det. Men det er eit ressursspørsmål. Me må prioritere dei ressursane me har. Då må me akseptere at me har pærebrann i visse område, seier seniorrådgjevar i Mattilsynet, Brita Toppe.
– Mattilsynet kan ikkje greie å stoppe pærebrann åleine. Me er heilt avhengige av at både kommunen og private grunneigarar i Lindås tek vekk sjuke plantar sjølve.