For ti år sidan oppsøkte gjerne studentar arbeidslivet mot slutten av studiet. No er dei på hugget frå fyrste stund.
Svoltne frå fyrste dag
På karrieremessa i Bergen leitar studentane etter framtida, og framtida byrjar tidlegare no enn den gjorde før.
- Det er gode moglegheiter framover. Ordrebøkene blir ikkje tomme i løpet av dei neste par åra, seier Anders Årskog.
Han har nettopp byrja på andre år på ingeniørstudiet, men har alt no teke arbeidet med å ta tempen på arbeidsmarknaden.
- Eg vil finne ut kva dei ulike verksemdene kan tilby, og kva jobbar som er mogleg å få i framtida.
Startar tidlegare no enn før
Stadig fleire studentar er tidleg ute med å byggje karriere.
- Studentane er mykje meir medvitne no enn før på at dei faktisk skal ut i arbeidslivet etter endt utdanning, seier leiar ved karrieresenteret i Bergen, Rønnaug Tveit.
(Artikkelen held fram under biletet.)
For ti år sidan venta studentar gjerne til dei var ferdige med utdanninga med å orientere seg om moglegheiter på arbeidsmarknaden, men i dag er studentane nyfikne frå fyrste dag.
- Dei veit tidlegare kva jobbar dei sjølve ynskjer, kvar desse jobbane er å finne samstundes som dei øver seg på å skrive søknad og CV.
- I tillegg er studentane flinkare til å finne nye vegar inn i arbeidsmarknaden. Dei nyttar ikkje alltid dei tradisjonelle kanalane, men er oppsøkande og aktive og nyttar seg ofte av nettverk, seier Tveit.
- Slik får dei det dei vil ha
Rønnaug Tveit trur studentane i dag i større grad får dei jobbane dei vil ha.
- Når dei er så tidleg ute med å orientere seg, får dei oftare dei jobbane dei vil ha òg.