NRK Meny
Normal

Ørkenfugl observert i Noreg – fuglekikkarar flokkar til Øygarden

Trompeterfinken observert i Noreg for andre gong i historia.

Fuglekikkere studerer trompeterfinken i Øygarden

SKODELYSTNE: Måndag hadde allereie om lag 20 fuglekikkarar samla seg i Øygarden i Hordaland for å få eit glimt av trompeterfinken.

Foto: Frode Falkenberg

Måndag føremiddag gjekk alarmen for norske fugleinteresserte. Spurvefuglen trompeterfink var observert i Øygarden kommune.

Meldinga fekk det til å gå kaldt nedover ryggen på Frode Falkenberg i Norsk ornitologisk foreining.

– Dette er ei verkeleg bombe, seier ornitologen.

Fuglen er berre sett i Noreg éin gong tidlegare. I 2013 chartra fugleinteresserte privatfly for å få med seg fuglen sitt opphald i Fredrikstad.

Trompeterfink

TROMPETERFINK: For andre gong i historia er ørkenfuglen trompeterfink dokumentert i Noreg. Ein sensasjon, konkluderer fuglemiljøet.

Foto: Bert de Bruin

Når ørkenfuglen dukkar opp i Noreg for andre gong, går difor alle alarmar i fuglemiljøet.

– Det er eit sjokk i miljøet at denne dukkar her på denne tida av året. Rett og slett ein skrell, kommenterer ein engasjert Falkenberg til NRK.

Nomade på avvege

Trompeterfinken er ein liten spurvefugl i finkefamilien, og gjekk tidlegare under namnet ørkendumpap. Arten held til i område med fjellørken, steinørken og halvørken i eit belte frå Kanariøyane i vest til Pakistan og India i aust.

Frode Falkenberg

ORNITOLOG: Frode Falkenberg i Norsk ornitologisk forening.

Foto: Per Vidar Raunholm

Trompeterfinken held seg som regel til eit avgrensa område, men nomadiske trekk gjer at han enkelte år dukkar opp i nye område – som Øygarden i Hordaland.

Sverige og Danmark har registrerte høvesvis ni og fire funn av arten, men fuglen er slett ikkje vanleg på desse lengegrader.

– Dette er definitivt ein som har forvilla seg langt nord. Fuglen er truleg eitt år og har nok hatt litt «trekkuro» i kroppen, i tillegg til å ha vore heldig med vêrtilhøva.

– Spektakulært

Fuglen blei oppdaga av Eirik Nydal Adolfsen. Han er ein ivrig naturfotograf og kom reint tilfeldig over ørkenfuglen på eit jorde i Breivik, vest i kommunen.

– Eg skjøna ganske kjapt at det var ein trompeterfink. Fuglen er liten og brun, men har eit kraftig raudt nebb og liknar ikkje på noko anna me har i Noreg.

Etter ein halvannan time jakt, fekk Adolfsen foreviga den vesle karen til linsa.

– Det er spesielt artig å tenka på at den vesle krabaten har floge såpass langt. Bestanden i Spania er såpass liten, at det er nærliggande å tru at fuglen har opphav i Nord-Afrika eller Midtausten.

Trompeterfink

SIST SETT I ØSTFOLD: Denne trompeterfinken slo seg ned på Øra i Fredrikstad i august i 2013. Fire år seinare er fuglen på ny dokumentert i Noreg.

Foto: Tommy Andre Andersen

Forventar storinnrykk til helga

Fuglen er mest truleg ein ung hann, ifølgje Falkenberg.

– Han blei truleg fødd i fjor. Slike eittåringar er mindre erfarne og hamnar difor lettare utanfor planlagd rute.

No valfartar fuglekikkarar til Øygarden. Måndag var det rundt 20 personar som fekk teke fuglen nærare i syne. Til helga ventar Falkenberg storinnrykk av skodelystne som vil dokumentera fuglen.

– Fuglen i Østfold heldt stand i Noreg i to månader. Det er godt mogleg at denne også held seg her såpass lenge. Kva den gjer etterpå, må gudane vita.

Siste video

Bilder med tillatelse fra TV2
Hovedfeltet på vei opp Laksebakken under sykkel-VM søndag 24. september
Se innspurten fra U23 rittet - bilder med tillatelse fra TV2