Det er geologar frå Statens vegvesen som har vurdert rasfaren på ny torsdag. Konklusjonen er at det ikkje er trygt å opna fylkesveg 344 i Eksingedalen i Hordaland i dag heller.
Til det er faren for nye snøskred for stor. Seinast i går gjekk det ei nytt skred på vegen mellom Nesheim og Brakestad.
– Rasfaren er framleis stor, og det er difor ikkje forsvarleg å opne vegen. Av omsyn til tryggleiken til arbeidarane er ikkje skredet på Gullbrå rydda, fordi det er fare for fleire ras, fortel prosjektleiar Ingebjørg Midthun i Statens vegvesen.
Ser fleire teikn på nye ras
Geologane ser i fjellsidene at det kan kome fleire ras. Det er spesielt oppsprukke snødekke i området som ekspertane ser på som sikre teikn på at nye ras vil kome.
– Vi ventar på kaldare vêr utan nedbør slik at snødekket blir stabilisert. Dette kan ta tid sidan snømengdene er store. I tillegg må vi ha betre sikt, avsluttar Midthun i pressemeldinga frå Vegvesenet.
Sidan onsdag førre veke har 28 innbyggjarar på Gullbrå i Eksingedalen vore isolert. Tysdag klarte helikopter å lande med matforsyningar og medisin.
