I gårdagens Brennpunkt fortalde NRK om korleis den nye høgskulen i Bergen var for liten allereie frå første spadetak. Heller ikkje den nye Kunst- og designhøgskolen, som skal stå klar i 2017 ser ut til å vere stor nok til å huse talet på elevar på skolen.
– Det er ei utfordring, absolutt ei utfordring, seier rektor ved Kunst- og designhøgskulen i Bergen, Gerd Tinglum.
Ho kan ikkje garantere at dei har plass til alle studentane når den nye skulen skal stå klar i 2017.
Skulen er dimensjonert for 300 studentar, men alt no er studenttalet oppe i 340.
Ho innrømmer at skulen sjølv ikkje tok høgde for auka i studentmassen dei siste åra.
– Me visste ikkje at bygget var for lite i 2012. Det at bygget er dimensjonert for 300 var med utgangspunkt i det studenttalet me hadde då bygginga starta.
LES OGSÅ: Ryddar plass til ny kunsthøgskule
– Såg for oss at den skulle bli stor nok
NRK Brennpunkt har gjennom fleire år granska resultata av kvalitetssikringsordninga som blei innført i år 2000. Hensikta med ordninga var å sikre at store statlege investeringar blir vellukka.
SJÅ OGSÅ: Meir om kvalitetssikring av store statlege prosjekt på NRK Brennpunkt
Allereie i ein statleg kvalitetssikringsrapport frå 2012 blei det stilt spørsmål ved om den nye Kunst- og designhøgskolen kom til å vere stor nok.
Likevel valde både skulen sjølv og kunnskapsdepartementet å gje grønt lys.
– Eg trur ikkje kunsthøgskulen i Bergen hadde vore tent med at me hadde stoppa prosjektet, seier Toril Johansson, som er ekspedisjonssjef for Universitets- og høyskoleavdelingen i Kunnskapsdepartementet.
– Viss me skulle ha starta opp med å endra planforutsetningar ville det ha betydd ei utsetjing av prosjektet.
Kunnskapsdepartementet meinte bygget kom til å kunne huse meir enn 300 studentar.
– Med fleksibiliteten bygget hadde, såg me for oss at det ville bli stort nok, sjølv om studentmassen skulle overstige 300, seier Toril Johansson.
LES OGSÅ: 1200 studentar og tilsette får ikkje plass
Kan måtte dele opp den nye høgskulen
Det kan ende med at den nye Kunst- og designhøgskolen må delast opp i fleire lokalitetar. Men rektor Gerd Tinglum trur likevel det er mogleg å få plass til alle i nybygget.
– Måten det er bygd på er veldig fleksibel. Me ser no på moglegheiter for å få inn det studenttalet me har.
– Du har tru på at alle studentane kan få plass på den nye skulen?
– Ja, det er det me jobbar for.
Sjå reportasjen frå då Muck-bygget blei rive for å gjere plass til høgskulen.