Meir enn fjerdeparten av kinogjengarane i 2018 gjekk for å sjå ein norsk film. Det utgjorde meir enn tre millionar kinobesøk.
Det er første gang marknadsdelen har vore over 25 prosent, fortel Guttorm Petterson, administrerande direktør i Film & Kino, til NRK.
Publikum vil ha norske filmar
Den norske storsatsinga «Skjelvet» fekk rekordgode besøkstal i opningshelga og enda på ein andreplass på topplista i 2018.
På tredjeplass finn me den kritikarroste «Den 12. mann», og på fjerdeplass ligg familiefilmen «Månelyst i Flåklypa».
Fem norske filmar er på topp 15-lista.
– Både breie barnefilmar og filmar som er populære og vender seg til ei stor målgruppe, gjer at folk framleis går på kino for å sjå norske filmar, seier Jørgen Stensland, nestleiar i Norsk film og kino.
Abba på topp
«Mamma Mia! Here we go again!» ligg på ein solid førsteplass av dei mest besøkte kinofilmane i 2018, med heile 306.641 fleire besøkande enn fjorårets førsteplass.
PR-sjef Bård Flaen i filmdistributøren UIP er svært nøgd med tala.
– Det var veldig gøy å sjå at Mamma Mia-effekten slo til igjen, ti år etter førre film, seier Flaen.
Han meiner at ein av overraskingane for 2018 var dei gode kinotala på «Mission Impossible: Fallout».
– Me visste at filmen ville bli stor, men filmscenane frå Preikestolen bidrog til eit ekstra løft her heime.
Geografiske forskjellar
Bergen kino, den nest største kinoen i landet, har mista 1,6 prosent av kinogjengarane. Leiinga trur det skuldast den varme sommaren.
Kinodirektør Elisabeth Halvorsen fortel at topplista hos dei er om lag heilt lik som den nasjonale. Med unnatak av «Månelyst i Flåklypa» og komedien «Norske byggeklosser».
– Den gjekk ikkje like godt heim hos vestlendingane som austpå. Eg trur det har litt med forskjellig humor i aust og vest å gjera.
Norske familiefilmar er ein vinnar
Også Halvorsen er glad for dei gode tala for norsk film.
– Det å ha to norske filmar blant dei tre mest sette, seier litt om populariteten til norsk film.
For 2019 tek ho fram «Amundsen» som ein potensiell norsk publikumsvinnar.
Totalt hadde kinoane i 2018 vel 12 millionar besøkande. Det er ein auke på tre prosent frå året før.