Norskbygd ferje forliste i Guineabukta: 100 menneske kan vera omkomne

Ferja MF «Austrheim» med meir enn 200 passasjerar om bord kantra og forliste sundag kveld i Guineabukta på veg frå Calabar i Nigeria til Kamerun, truleg til hamnebyen Douala.

– Skipet var truleg overlasta, seier ein person til nettstaden The Nation.

The Nation var måndag på terminalen som ferja gjekk frå i Calabar i Nigeria. Her var dei i kontakt med personen som ønsker å vera anonym, men som bekrefta at ferja gjekk ned.

Tre personar vart funne døde og 107 personar er redda, opplyser kamerunske myndigheiter.

Ifølge tenesta Marine Traffic forlét ferja Calabar klokka 11.45 lokal tid sundag.

Elitekorpset Rapid Intervention Battalion (BIR) frå Kamerun greip inn etter kort tid og fekk redda 107 av passasjerane som var om bord i ferja. Det er ikkje kjend kva som har skjedd med dei andre passasjerane.

Tidlegare vestlandsferje

MF «Austrheim» er ei tidlegare fjordferje bygd som MF «Finnøy» for Det Stavangerske Dampskipsselskap i 1971. Fotograf og forfattar Harald Sætre har skrive fleire bøker om rutebåtar og ferjer knytt til Hardanger og Sunnhordland.

Han fortel at ferja i mange år gjekk i Rogaland. Den blei seinare overtatt av HSD Sjø AS og fekk då namnet MF «Austrheim». Den gjekk i fleire samband i Hordaland fram til 2012, før den i februar same år blei seld til utlandet.