Etter ein eventyrleg start på sesongen i første divisjon, har det byrja å butta i mot for dei grønkledde frå Sotra. I dag tok dei imot Bærum i den 18. serierunden, men sjansesløseri og dårleg forsvarsspel gjorde at bortelaget tok med seg alle poenga.
– Me spelar svært bra første 25 minuttane, oppsummerar Ørjan Hopen, som er på lån frå Sogndal.
Og det byrja bra for Nest-Sotra. Etter berre fem minutt slo leigesoldat Hopen eit hjørnespark som kaptein Ruben Hetlevik flikka vidare i mål.
– J**** billige mål
Etter ein halvtime slepp Nest-Sotra bortelaget inn i kampen. Monir Benmoussa sette inn utlikninga.
– Vi begynte å tape duellar og sprakk opp i organiseringa. Etter det verkar det som me vert usikre. Men me rettar på det i pausen, seier trenar Alexander Straus.
Ut på bana igjen gjekk det seg likevel ikkje til for heimelaget, trass fleire gode sjansar til å ta leiinga. I staden kontra Bærum og Amahl Pellegrino inn 2–1 målet, og dei grønkledde sitt tredje strake tap var eit faktum.
– Det er juniorfeil som pregar oss og me slepp inn j**** billege mål. Det er fullstendig Texas i både forsvaret og midtbana, spesielt på 1–1 målet. Me har ein del å retta på, seier Hopen skuffa.
Må vinne neste to
Med berre eitt poeng på dei fem siste kampane ligg Nest-Sotra på tiande plass i 1. divisjon med 23 poeng. Dei neste to kampane er mot Alta og botnlaget HamKam.
– Det er berre å sette seg på bommen og bykse ut igjen. Me har ingenting å tape og må gå for to sigrar i dei neste kampane, seier Hopen.
– Det er seks poeng som gjeld, ikkje noko anna. Men då må me bli meir nøyaktige, avsluttar trenar Straus.