NRK Meny
Normal

Mediebedriftene i Bergen går saman om gigantisk medieby

Etter to år med planlegging er det offisielt: Dei fire store mediebedriftene i Bergen vil flytta saman.

Etter to år med planlegging er det offisielt: Dei fire store mediebedriftene i Bergen vil flytta saman.

VIDEO: Alf Hildrum i TV 2 og Grete Gynnild-Johnsen i NRK deltok på pressekonferansen då MediaCity Bergen blei presentert i dag.

På ein pressekonferanse klokka 12 torsdag vart det klart at alle dei fire store mediebedriftene i Bergen vil vera med på MediaCity Bergen.

TV 2, NRK Hordaland, Bergens Tidende og Bergensavisen ønskjer alle å flytta inn i ei ny medieklynge i Lars Hilles gate i Bergen, som etter planen skal stå ferdig i 2016 eller 2017.

Det digitale produksjonsselskapet Vizrt og medieutdanninga ved Universitetet i Bergen er òg med på prosjektet. Målet er at også fleire andre medieaktørar skal vera med på flyttelasset.

Slik vert den nye mediebyen i Bergen

VIL FLYTTA SAMAN: TV 2, NRK Hordaland, Bergens Tidende, Bergensavisen, Vizrt og Universitetet i Bergen vil alle få eigne lokale i den planlagde medieklynga.

Foto: MediaCity Bergen

1200–1500 arbeidsplassar

MediaCity Bergen, som er det offisielle namnet, kan verta arbeidsplass for mellom 1200 og 1500 mediefolk.

Video Alf Hildrum om OL-seieren

OPTIMISTISK: Sjefsredaktør i TV 2 Alf Hildrum.

Foto: Nyhetsspiller

– Mediebransjen er inne i ein periode med store og raske endringar. Me har derfor stor tru på å samla kreative miljø og skapa felles møteplassar på tvers av organisasjonane, seier sjefsredaktør i TV 2 Alf Hildrum.

Ideen vart først offentleg kjend i 2011 då TV 2 tok kontakt med Bergen Næringsråd og dei andre mediebedriftene i Bergen.

Etter at fire ulike eigedomsprosjekt er vurdert er det no avgjort at det skal innleiast sluttforhandlingar med Entra Eiendom om ein leigekontrakt i Lars Hilles gate 30.

Høgast i Bergen

Lokala som i dag fungerer som regionkontor for DnB skal byggjast heilt om og få eit samla areal på 45000 kvadratmeter. Bygget er i dag det høgaste i Bergen, med sine tre karakteristiske tårn.

Unni Arnøy

FORNØGD: Regionredaktør i NRK Hordaland Unni Arnøy.

Foto: NRK

– Eg er godt fornøgd med valet, og glad for at me får jobba vidare med medieklynge. Trua på prosjektet har vakse seg sterkare undervegs i prosessen, seier regionredaktør i NRK Hordaland Unni Arnøy.

Også Alf Hildrum trur prosjektet vil bety eit løft for TV 2 som i lengre tid har hatt eit ønskje om større og betre lokale.

– For TV 2 sin del ser eg fram til å få eit moderne, funksjonelt og fleksibelt mediehus som kan effektivisera tv-produksjonen og løfta oss ytterlegare, seier sjefsredaktør i TV 2, Alf Hildrum.

Medieklynge Lars Hilles gate

HØGAST I BERGEN: Bygget som i dag husar DnB sitt hovudkontor i Bergen skal byggjast heilt om. 10000 kvadratmeter skal leggjast til den eksisterande bygningsmassen.

Foto: Entra

– Stolte og glade

Det er arkitektkontoret MAD i Oslo som skal stå for utforminga av bygget, som skal få ein stor interaktiv mediefasade mot Lars Hilles gate.

Bygget skal etter planen byggjast ut med om lag 10000 kvadratmeter.

– Me er både stolte og glade for at vår løysing vart vald for å samla mediehusa og utdannings- og forskingsmiljøa i eitt felles miljø, seier Klaus-Anders Nysteen som er administrerande direktør i Entra.

Det vert òg planlagt eit såkalla Greenhouse i den nye mediebyen, eit veksthus der gründerar og småbedrifter skal kunna utvikla seg.

Endeleg avgjerd til hausten

Den nye mediebyen i Bergen er inspirert av liknande samarbeidsprosjekt i byar som Manchester og Malmö, men fire konkurrerande bedrifter som flyttar saman gjer likevel prosjektet unikt i Norden.

Ein delegasjon av leiarar frå dei ulike bedriftene var i fjor på studietur i England for å sjå på den britiske løysinga, der BBC har starta stort på fjernsynsproduksjon.

Sjølv om alle dei fire mediebedriftene, Vizrt og universitetet no har konkludert med at dei ønskjer å vera med på medieklynga, vert den endelege avgjerda om flytting tatt i august eller september.

Innholdet som skulle vises her støttes dessverre ikke lenger.

Siste video

 Programleder Mariann Reikerås
13 lam rømde då bilen dei vart frakta med kolliderte. Dyretransporten fekk ein brå stopp og sauene stakk til skogs.