26-åringen blir framstilt for varetektsfengsling i morgon, onsdag, i Bergen tingrett. Det opplyser Hordaland politidistrikt i ei pressemelding.
Mannen vart arrestert måndag og er sikta for fem ran som er gjort i Bergen den siste tida:
- Ran av 7-Eleven på Engen 5. september 2015
- Ran av 7-Eleven i Ladegårdsgaten 1. oktober 2015
- Ran av Deli De Luca på Engen 21. oktober 2015
- Ran av 7-Eleven i Ladegårdsgaten 29. oktober 2015
- Ran av 7-Eleven i Ladegårdsgaten 31. oktober 2015
Ransbølge
Det har vore ei ransbølge i Bergen sentrum i haust. Også Deli De Luca i Torggaten og Esso-stasjonen i Kanalveien har hatt ubedne og trugande gjester på besøk.
26-åringen som blir framstilt for fengsling i morgon skal ha brukt anten kniv eller ei sprøyte til å truga personalet med under rana. Han har fått med seg eit mindre pengebeløp kvar gang.
Også andre stader i fylket har ransmenn vore på ferde. På Voss vart ein bensinstasjon rana av fire unge menn for knappe to veker sidan. Her er alle blitt arrestert og sikta av politiet.
Tidlegare domfelt
Fengslingsmøtet byrjar klokka 09.00 i Bergen tingrett onsdag morgon. Trine-Benedikte Opdal er politiadvokat.
Den arresterte mannen er tidligare domfelt for ran av kiosk.