I snitt kastar kvar nordmann nesten 30 kilo med elektronisk søppel kvart einaste år, ifølge tal frå FN. Det er med å bidreg til at vi tronar øvst på verdstoppen i kasting av elektronisk avfall.
Og dei som tar imot avfallet har den siste tida merka ekstra stor pågang av folk som kvittar seg med velfungerande TV-apparat.
Årsaka? Mange vil sjå fotball-EM på ein ny og større flatskjerm, trur renovasjonsselskapet Bir i Bergen.
– Vi har merka auken. Spesielt er det større fjernsyn som blir kasta på denne tida, fortel Kristin Bjordal hos Bir.
Femti prosent auke i salet
Då NRK besøker renovasjonsselskapet klargjer Bjordal ein titals tv-apparat som skal sendast vidare til gjenvinning. I vår har det vore ein jamn straum med bergensarar som har vore innom for å kvitta seg med ein TV dei meiner dei ikkje lenger har bruk for.
Men frå søppeldungen går turen kanskje rett vidare til fjernsynsforhandlarane, i alle fall om vi skal tru salsstatistikken.
I Elkjøp sine butikkar har dei på landsbasis selt 50 prosent fleire fjernsyn i stor storleik dei siste tre vekene før EM, samanlikna med same periode i fjor.
– Det går større og større TV-ar no. Vi ser spesielt at folk vil ha store skjermar til å nyte meisterskap som fotball-EM og OL. Det går mest i fjernsyn i storleiken 50 og opptil 80 tommar, fortel varehussjef Bård Fredagsvik hos Elkjøp i Fana.
Les også: Ingen samlar inn meir e-avfall enn nordmenn
Godt år for fjernsynet
I snitt blir det selt over 400.000 nye TV-ar kvart år her i landet. Men frå toppåret 2007 med 650.000 selde apparat har det gått jamt og trutt nedover til 387.000 selde fjernsyn i 2015.
Med salsauken den siste tida ligg prognosen for 2016 på 400.000 selde fjernsyn – ein auke på 3,35 prosent frå i fjor.
Statistikken viser også at TV-salet gjekk opp i 2014, same året som fotball-VM vart arrangert i Brasil.
Passerte USA
Men nordmenns forbruk av fjernsynsapparat får kommunikasjonsrådgjevar Tina Skudal i Bir til å sukka.
– Vi kjøper veldig mykje elektronikk og tronar diverre på kastetoppen av elektronisk avfall. Vi passerte amerikanarane for nokre år sidan. Diverre, fordi CO2-avtrykka frå produksjonen av slikt er veldig stor, seier Skudal.
Ifølge ein rapport frå United Nations University, er det Kina og USA som i 2014 genererte mest elektronisk avfall. Men ser ein på e-søppel per innbyggjar, er det altså Norge som tronar på topp: