NRK Meny
Normal

Legg vekk overgrepssak mot foreldrepar

Ny rapport syner at skadar på 15 månadar gamal jente skuldast sjukdom. – Ei stor lette for foreldra, seier forsvarar til overgrepssikta.

Fengslingsmøte i Bergen tingrett politibil utanfor tingretten

LEGG TRULEG VEKK OVERGREPSSAK: Ny rapport frifinn foreldrepar som er sikta for overgrep. – Ei stor lette. Dei har levd i eit mareritt, seier forsvarar.

Foto: John Nøstdal

Dei har levd i eit mareritt i fleire månadar

forsvarar Henrik Birkeland

Det var i oktober at eit foreldrepar i Nordhordland vart sikta for seksuelt overgrep mot deira då eitt år gamle dotter. No er rapporten frå dei sakkunnige klar.

Skadane som jenta hadde skuldast ifølgje dei eit spesielt sjukdomstilfelle. Dermed legg politiet truleg vekk saka mot foreldreparet, skriv avisa Nordhordland.

Til NRK seier mora sin forsvarar at ho er svært letta over rapporten.

– Ho er sjølvsagt letta over at rapporten er frifinnande. Foreldra har levd i eit mareritt i fleire månadar, seier Henrik Birkeland, advokat hjå firmaet Alvheim & Hansen, til NRK

Statsadvokaten avgjer

Førebels er foreldreparet framleis formelt sikta i saka. Når rapporten er endeleg vil politiet skriva si innstilling som blir levert vidare til Statsadvokaten. Det er dei som avgjer om saka blir lagt vekk eller ikkje.

– Rapporten skal også godkjennast av Den rettsmedisinske kommisjonen. Fleire kommentarar i saka har eg ikkje før rapportane er klare, seier politiadvokat Janne Heltne til NRK.

Det var tilsette ved barnehagen til jenta som varsla barnevernet i oktober. Politiet vart så kontakta, og foreldra vart arrestert av uniformert politi i barnehagen.

Faren vart varetektsfengsla, medan mora slapp fri etter fleire avhøyr med politiet. Etter tre veker i varetekt vart også barnefaren sleppt fri.

– Har orda i behald

Paret har heile tida stilt seg uforståande til siktinga og nekta straffskuld. Det oppstod også ein rykteflaum på den vesle plassen familien kjem frå. Forsvarar Birkeland seier det har vore ei stor belastning for begge.

– Dottera deira har vore i barnevernet si omsorg sidan saka starta, og er det framleis.

Advokat Jan Bakke forsvarar faren, og seier til avisa Nordhordland at han ikkje vil kommentera saka før endeleg avgjerd frå Statsadvokaten ligg føre.

– Men min klient har aldri erkjent noko straffskuld. Når ein ser på saka no, så har han sine ord i behald, seier Bakke til avisa.

Siste video

Programelder Øyvor Bakke
Listetoppene i Hordaland møttes til stor debatt, i samarbeid mellom BT, BA og NRK.
Bergensartisten avsluttet den store valgdebatten på Festplassen i Bergen.